>>سرقتك بالزمن لحظه ... وعشتك با الفراق اوقات <<

اللهم صلِ على محمد وآل محمد

اليكم قصه
من
صميم المجتمع السعودي

.......بقلم أميرة الورد

نبدء بشخصياتنا ...
********
عايله بطلنا (ماجد)
ماجد كبير اخوانه عمره 32 سنه
مشاري عمره 27 سنه
فارس عمره 26 سنه
اماني متزوجه عمرها 30 سنه
ريوف متزوجه عمرها 24 سنه
البتول عمرها 22 سنه

×

×

عيله ابو متعب (صالح)
متعب عمره 60 متزوج وعنده بنات وعيال كبار ...(يرد ذكرهم لاحقا بالقصه)
بندر عمره 32 سنه
عمر عمره 28 سنه
الوليد عمره 26 سنه
يزيد عمره 19 سنه
آمال متزوجه وعمرها 27
اريام متزوجه عمرها 26 سنه
ندى عمرها 25 سنه
جود عمرها 23 سنه

*******

(سرقتك بالزمن لحظه .. وعشتك بالفراق اوقات)***********
(الفصـل الاول )
ام ماجد " يمه البتول تعالي ردي على تلفون البيت "
نزلت البتول تركض ويد فيها لفافه شعر واليد الثانيه ماسكه بها شعرها ، قالت وهي ماده بوزها "يمه وين الشغاله ليش ماردت انتي ناسيه اني بروح لاختي اماني "
ام ماجد بابتسامه "ههههههه يمه الشغاله ما تتكلم الا انقليزي من بيفهم عليها يا حسره "
البتول "هههههههههههههههههههههاي صدقتي اذكر خالتي ام يحيى يوم دقت علينا جلست تصارخ في التلفون هاه هاه "
ام ماجد "ههههههههههههههههههههه طيب ردي نشفت كبد الي يدق "
اخذت البتول السماعه قالت برباشه "yes"
"الو السلام عليكم "
ارتبشت البتول وطاحت اللفافات الي بيدها قالت بعصبيه "وعليكم نعم "
قال بندر بهدوء"ينعم عليك وين ماجد "
مسكت البتول نفسها لا تنفعل لانها ماتطيق ولد عمها ذا ..ما تواطنه في عيشة الله قالت بدون نفس "مدري عنه "
قال باستهزاء " اخته وماتدرين عنه وين عايشه انتي "
قالت بانفعال "يا سلام بتتحكم فيني من الحين "
مسك اعصابه وهو يقول في نفسه ×صبر جميل والله المستعان×
قال بعصبيه " عن حركات البزران قالو لك اني فرحان يعني بزواجي منك"
انجرحت البتول من كلمته مهما كانت تكرهه وتكره حركة المرحوم ابوها يوم زوجها لولد عمها الكبير وهي ما كملت عشر سنوات ..حرام عليه هو اكبر منها بـ عشر سنين ليش يسوون كذا
فيها ليش يقرر مصيرها عنها ليش !
قالت له بقهر فيه دلع " ماتعرف تجامل انت "
قال باستهزاء " لا،(كنه يتحسر) شفتي القهر متزوجه واحد مايعرف يجامل وكبير بالسن "
حمر وجه البتول ولقطت وجهها لانها تذكرت انها قد قالت لجود بنت عمها انها ماتبي بندر لانه كبير عليها بالسن ومن سوء حظها انه سمعهن وهن يتكلمن حتى انه قال لها "هذا نصيبكـ ومالاعتراضك معنى .."
خنقتها الغصه :-الحين انت وش تبي
بندر بدون مايقدر يمسك نفسه "ههههههههههههههههه"
عصبت "جالسه انكت انا "
بندر ببرود "ما يلبق لك التنكيت .. ليش قد سمعتي في حياتك عن مغروره تعرف تنكت "
تاثرت مره من كلامه لو انها قدامها كانت خنقته لين يموت ...
قاطع افكارها صوت ...
"البتول شفيك"
التفتت بخوف وشافت اخوها ماجد واقف وراها رمت السماعه وركضت لغرفتها تبكي .. عقد ماجد حواجبه واخذ السماعه "الوووو"
قال بندر بعصبيه :-الحين انت وينك وبعدين ليش ماترد على جوالك
ماجد وهو يتافف:-اف شفيك محترق
بندر بعصبيه :- لازم يرتفع ضغطي كل مره ادق فيها عليك
ماجد بضيق :-الحين وبعدين معكم والله انكم تجيبون الهم للواحد
بندر حس انها زودها على ولد عمه وحب يروق الجو :-اسمع ما رديت لي خبر بتطلع البر معنا ولا لا
ماجد انشرح صدره وباله من سيره البر والمكاشيت :-ما يبيلها كلام اعتمد خلاص كلمت الربع
بندر :-لا هالمره بنطلع بدون ربعنا
ماجد بتعجب :-ليش ؟
بندر :-ياخي ابوي هافه نفسه على تخييم بالبر ومن زمان وهو يطري عاد بما ان الدنيا ربيع الحين والصيد وافر قلت فرصه زينه تطلع عيلتنا كلها
سكت ماجد شوي وقال :-انت ناسي ان امه لا اله الا الله مخيمه الحين كيف تبي بناتنا يطلعن البر وينامن فيه
سحب نفس طويل وقال :-ماجدوه خل عنك حركات التعقيد البنات ودهن يطلعن البر لهن كم سنه ما طلعن
ما دخلت فكرة طلوع البنات راسه :-حتى لو ؟ انت تعرفني وبعدين حنا ما نمنعهن عن الطلعات بس طلعه بر ماني بالي اايدها
بندر بملل :-ياربي منك بدوي معقد
ماجد :-قم انقلع
بندر :-ههههههههههههه ابشر بس قل تم ياخي حرام عليك تكسر بخاطرهن
ماجد يستهزأ فيه :-يا ولد يا حنون
بندر :-هههههههههه هاه يا النسيب شقلت
ماجد :-قلت لا اله الا الله والله انك لزقه عنزروت
بندر :-ههههههههههههههه اعجبك
ماجد :-هههههههههه لا والله ما تعجبني
بندر يستهبل :-ياربي مايعرف يجامل الله يعين الي بتاخذكـ
ماجد :-ههههههههههههاي يجيب الله مطر
بندر :- الايام بيننا يا ولد عمي يا خوفي تطيح ومحد يسمي عليكـ
ماجد بكبر :-
ماترتضي نفسي مذله وحقران
اردها عن من سعالي بذلي..
نفسي عزيزه ساميه فوق يافلان
وابعد من نجوم الثريا محلي..
الله خلقني وهامتي فوق الامتان
واخذ من الدنيا تجارب واخلي..
واصبر على مر الليالي والاحزان
وارضى بماقدر من الله وحصلي
بندر :-اوف اوف تكلم الشاعر اسمع ياخي اقول لك من الحين انت بالشعر راح تغلبني ..
ماجد :-ههههههه طيب رح زهب العزبه متى تبينى نطلع ..
بندر :-الخميس
ماجد بهدوء :-انت ناسي شغلي
بندر :-خذ لك اجازه حشى مكينه مو ادمي
ماجد بابتسامه كبيره:-بسم الله من عينك خلاص تم
بندر تنفس بقوه مو مصدق كيف ان ماجد الشديد وافق بشوية ضغط منه :-اتفقنا يالله مع السلامه
ماجد :-هلا والله مع السلامه
سكر ماجد السماعه وطلع لغرفه اخته .. وبعدين البنت ذي جابت له احباط ..
كان واقف ويفك ازارير ثوبه الي فوق .. جت مه وقالت :-يمه
التفت ماجد وقال بحنان :-هلا ياالغاليه امري
امه بابتسامه فيها حزن :-يمه اختك شفيها طلعت غرفتها تصيح
مسك اعصابه لا يتافف من اخته وعنادها ودلعها الزايد :-ابدا يمه ولا شي
امه بحزن :-يمه البتول طالعه تبكي وتقول مافيها شي
حب راسها وقال وهو يحط شماغه على كتفه :-انا بطلع لها وان شاء الله يكون خير
مر من جنب امه ومسكته مع يده من فوق ..ناظرها وقرا الي تبي فعيونها
امه :-لا تقسى يمه لاتقسى عليها
هز راسه وماتكلم وطلع لغرفه اخته لازم يحط حد لتصرفاتها ذي مع زوجها .. مايكفي انه مقدر مشاعرها وماجل العرس يمكن مع نهاية الجامعه تتقبل الفكره لكن كل ما طال الوقت كلما زاد عنادها ، عمره ماحب القسوه ولا كان يستخدمها الا نادرا جدا لكن فيه مواقف تجبره تغصبه وتفرض سيطرتها عليه . البتول مو اخته بس البتول تربت تحت نظره تحت مسؤوليته وغلاها يفرق عن غلا باقي اخواته المتزوجات ..
وصل لباب غرفتها ودقه ومحد رد رجع دقه مره ثانيه وماردت اخته ويعرفها اكيد مطفيه النور ونايمه على السرير تصيح ..
عد لين ثلاثه وقال بهدوء :-البتول
انخرش قلب البتول لانها تخاف من اخوها او نقدر نقول تحترمه مره لانه كان بمكان ابوها ... اخوها الي ياما حن عليها اخوها الي كان عون لها الي عمره ماقصر عنها بشي ..صحيح محد يجي وياخذ مكان الابو لكن ماجد غير ، ماجد محور حياتها وكل شي فيها ... مسحت دموعها وفتحت الباب ..

قالت بادب :-هلا ماجد
ماجد :-ممكن ادخل
البتول وهي تحاول تخفف من خوفها :-ها...اي ايه ممكن ليه لا
دخل ماجد وجلس على الكرسي الي جنب سريرها قال بهدوء وماخفى عليه تاثيره الكبير على اخته :-انا راح ادخل مباشرة للموضوع وبعدين معك
بلعت ريقها من الخوف سبحانه الي حط رهبته العظيمه بقلبها رغم ان ماعمره رفع يده عليها ولا رفع صوته حتى لكنه كذا شخصيه حازمه شديده جديه وتنزل الرهبه في قلوب الناس حتى المقربين منه ..
قال وهو يحاول يمسك نفسه لا ينفعل :-انتظر ردك
البتول فيها احيانا نزعات متمرده حتى على ماجد الي يرهبها .. قالت بثقه :-ماسويت شي شسويت انا
قال بعصبيه لكن صوته ما ارتفع لحظه عن مستواه الطبيعي :-البتول
خافت وضاعت علومها :-انـا...انـ
وفكتها مناحه وجلست تبكي ... ناظرها ماجد بضيق وهو يقول في نفسه "الحين الواحد ماياخذ من الحريم لا حق ولا باطل من ورى حركات البكا ذي "
جلست تصيح وتنتفض كسرت خاطره وقال بحنيه :-البتول اذا بتجلسين كذا ماراح افهم منك شي
مسحت دموعها وبعد جهد جهيد قالت :-ماجد
ابتسم :-عيونه
ابتسمت ورجعت بكت من نبرة الحنيه الي سمعتها في صوته وحستها من نبرته وشافتها بعيونه
تعوذ من ابليس ... اليوم ذا باين من اوله ...
قالت بانفعال :-انا مابي اتزوج بندر
قال بهدوء :- انتي الحين زوجته
قالت بانفعال وهي ترجع شعرها الاسود الطويل ورى بقوه :-ابي الطلاق مابيه
طلعت عيون ماجد قدام وفز من مكانه قال بقوه :-طلاق
خافت وقالت بهمس :-ا .. ايه
قال وهو يناظرها بقوه :-ليش وش الاسباب
قالت بتمرد :-كذا مابيه
عصب ماجد منها ومن عنادها ودلعها :-كيف كذا مابيه
البتول بصراخ :-كذا مزااااااااااااااااج
رفع يده بيضربها لكنه مسك نفسه فاخر لحظه وهو يتذكر وصية ابوه له قبل لا يموت .. انكمشت على نفسها وغمضت عيونها تنتظر الكف وحرارته على خدها ...
لكنها فتحت عيونها على مسكته ليدها من فوق قال وهو يهمس بعصبيه عشان امه ماتسمعه وتتنكد :-اسمعي يا بنت بندر الف وحده تتمناه والحين هو زوجك رضيتي ولا مارضيتي وان سمعت أي اعتراض او كلام من كلامك الفاضي الي تعودت عليه لا تلومين الا نفسك
قالت وهي تبكي :-بس ياخوي.....
هزها :-ولا كلمه انتي ماتعرفيني زين يا البتول لا تخليني اتصرف معك بطريقه لا انتي ترضينها ولا انا ارضاها بعد يكفي بس انها امنية ابوي وقراره الله يرحمه
فك يدها وطلع قبل لا يمد يده لانه حس بنفسه قريب من هالتصرف
صرخت :-لو ابوي حي ما رضى على الي تسويه فيني وينك يا بوي ...
كان واصل لباب غرفتها مسك طرف الباب بيده وضغط عليه بقوه كملت كلامها الي يجرح حتى لو كانت اخته الصغيره وجاهله ومن هالكلام :-ايه ايه لو ابوي حي ما تكبرت علي عشان بندروه خويك
وهنا وبس ...
فار طبعه الحامي وراح لها بسرعه ومسكها مع يدها وهو يصارخ لاول مره حتى البتول نفسها خافت موت منه :-اسمعي سنين وانا اسمع هالكلام الي مامنه فايده وربي ان بندر السنافي خساره فيك
قالت بقلة ادب نظرا لانها وصلت لمرحلة التبلد والتمرد :-اشبع فيه انا مستغنيه عنه
الي مايعرفونه ان امهم كانت واقفه برى وسمعت كل شي ...
صرخ ماجد :-انا مليت منك هذا جزى التربيه ..
البتول وهي تصارخ :-هذا حلال ابوي مو حلالك
كان كلامها كان زي طعنة الغدر الي تغافل الواحد نست ايام السهر والتعب لما كان يجي من الجامعه تعبان ويمرها بغرفتها ويلقاها مريضه ويرمي كتبه ويركض بها لاقرب مستشفى حتى امه ماكانت تدري عنه ..
نست يوم كانوا البنات يزعجونها بالمدرسه وترجع ودمعتها على خدها وبمكالمه وحده للمديره انحلت المشكله وماتعرضت بعدها لاي مضايقات ...نست ونست ونست اشياء كثيره
التفت لجهتها وقال بصوت مافيه ملامح ومعالم :-شقلتي
البتول لا انفعلت تروح كل اخلاقها الحلوه في لمحه بصر :-الي سمعته انت مو متفضل علي بشي
لاول مره يرفع يده لكن صرخة امه منعت كفه عن وجه البتول التفت بعيون فيها من الحزن مثل التعصيب والزعل ..
قالت امه بوجه شاحب :-لا يمه لا تضربها
قال بكل صوته الي لاطلع في مكان عمه السكون والترقب :-عشان خاطرك يمه بنسى الي قالته لكن يكون في معلومها (وجلس يناظرها بقوه) ان زواجها من بندر راح يكون بالعطله الطويله يعني لا انتظار لوظيفه ولا يحزنون
انصدمت البتول وشوي وتنهار قالت بدلع وبكا :-يمه
جمدت امها قلبها وقالت :-الي تشوفه يمه
طلعت عيونها قدام تزلزل الكون تقول لهم تكرهه تحقد عليه ليش مايفهمون الاهل يدورون راحه بناتهم وهم رجعيين في تفكيرهم واذا كانت هذي رغبه ابوها هذا مايعطيهم الحق في تجاهل رغبتها ..
صرخت :-ماراح اتزوجه لو اخر يوم في حياتي
مر من جنبها وقال وهو ماشي :-لا جيتك اشاورك ذيك الساعه قولي رايك ..
قال لامه يوم صاار جنبها :-راح نتكلم انا وانتي بكره الصبح قبل لا اروح الدوام لاني الحين تعبان وابي انام
طلع من الغرفه مايشوف قدامه مايكفي الي صار له اليوم تطلع له اخته بافلامها الهنديه المعتاده
دخل غرفته ورمى الشماغ على السرير يبي يتمدد يرتاح يفرد ظهره شوي ...فك ازارير ثوبه وترفق على اخر زر لسى صدره مورم ويعوره يحمد ربه انه ماجاه كسر ولا تهشم صدره وانطبق على قلبه ورئته ...
دق الباب تحمل الالم وسكر ثوبه :-ادخل
دخلت امه الغرفه وقالت بعيونها الحنونه :-يمه انت بخير
ابتسم :-الحمد لله
سكتت امه لانه ماراح يتكلم ماجد وتعرفه قالت بحنيه :-نم وارتح انت لك يومين في الدوام مهلك نفسك وبكره الصبح بيننا كلام
ماجد بهدوء :-ان شاء الله
ماصدق امه طلعت من هنا الا ويحط راسه على طول ...
^^^^^^^^^

>>في بيت ابو متعب
قالت ام متعب وهي تصب لزوجها قهوه :-تفضل
كان سرحان بعالم ثاني ... كررت كلامها :-ابو متعب تقهو
التفت يم زوجته وام عياله الي عاشرته خمسين سنه على الحلوه والمره ، اخذ الفنجال منها ..
قالت له :-علامك مهموم وسرحان
قال ابو متعب وهو يعدل نظارته العريضه على وجهه الي جعده الزمن لكن وقاره بقى زي ماهو ..:-والله افكر في هالعيال وفي مستقبلهم
ام متعب :-ههههههههه أي عيال الله يسلمك ..كلهم كبروا
ابو متعب :-بلا المسؤوليه ماتزيد الا اذا كبروا
ام متعب –يا ابن الحلال اترك عنك الافكار الي ترفع ضغطك وسكرك وتتعب صحتك وبعدين اصغر عيالنا كلهم جود وجود حرمه الحين وهذي اخر سنه لها بالجامعه
قاطعها بوجه مهموم :-اخوي سلمان الله يرحمه امن مستقبل بنيته البتول وان وش سويت لمستقبل بنتي
قالت ام متعب بضيق :-صالح علامك موسوس اليوم ...
قال بكابه :-انتي عارفه ان المرض الي بكبدي كل يوم يزيد وانا موب دايم لها
خنقتها الغصه والله لولا حلفه بالطلاق عليها لتعلم عياله عشان يعرفون ان ابوهم مريض بالكبد :-لا تقول كذا
ابو متعب :-انا ما انكر ان متعب حنون وقلبه كبير لكنه مايعرف لجود مثلي وراح يقسى عليها واجد وعارف طبع بندر الحامي ولابيه يتمشكل مع اخوه غير العيال الباقين ...
سكتت ام متعب هنا معه حق عيالها وتعرفهم ...
ام متعب :-يعني وش السواة نخطب لبنتنا ...
طقت الفكره براسه شلون مافكر فيها من زمان ... ناظرته ام متعب وعرفت ان كلامها الي تو ما مر عليه مرور الكرام وانه دخل داخل هالعقل الي لا يكل ولا يمل من التفكير والتحليل والقرارات ..
قالت بصدمه :-بتخطب لبنتنا ..
سكت ابو متعب ومارد عليها ..وفي هاللحظه دخل عليهم بندر ...
"السلام عليكم صباح الخير" ثم حب راس امه وابوه
ابوه "صباح النور "
بندر " كيف حالك يبه اليوم "
ابوه " الحمد لله زين بشر جهزت للرحله "
بندر "-ايه كل شي زين والخيام راح تسبقنا بيوم للموقع الي اختاره ماجد "
ابتسم ابوه "اذا ماجد الي مختاره فاكيد انه موقع طيب "
بندر "ههههههههههه والله اني عارف انه مايجوز لك الا شغل ماجد فقلت احترم نفسي واخليها عليه"
ابوه :-هههههههه فيكم الخير كلكم بس ماجد يعرف الي يجوز
"ماجد ماجد الحين اهلي ماعندهم سيره الا هو "
دخلت جود الغرفه وكتبها على يدها بتروح الكليه "صباح الخير"
حبت على راس ابوها وعلى راس امها وجلست
ابوها :-صباح النور يبه ..
اخذت لها كاسه شاهي على السريع ووقفت عشان تطلع للسواق امها :-يمه افطري كلي شي
جود بابتسامه حلوه :-تاخرت يمه عندي محاضره بعد ربع ساعه..
امها :-براحتك بس انتبهي على نفسك
جود :-من عيوني سلام
الكل "وعليكم السلام"
لبست عبايتها وتغطت وطلعت للسواق ومعها اخوها يزيد الي يدرس بالثنوي ويروح معها لانها ماتركب مع السواق بلحالها ...
يزيد :-يا الله صباح خير ..
جود :-هلا والله شفيك تقولها من ورى خشمك
يزيد :-هههههههه كشتك علامها طايره
جود :-ههههههههههه قم ضف وجهك هذا يسمونه تجعيد يا جاهل
تذكرت :-بعدين تعال كيف شفت كشتي وانا متغطيه
يزيد :-ههههههههه شفتك قدام المرايه وانتي تلبسين عبايتك طبعا ما تنلامين ألي يشوفك يقول ماشافت مرايات بحياتها
جود :-ههههههههههههههههه كيفي حره
يزيد وهو يزين كتبه على يده :-طيب ياحره اركبي تاخرنا
ركبوا السياره وراحو ..
*
*
*
>>بيت ماجد
طلع ماجد من الشاور ولبس ملابسه ...دق جواله
"الو"
بندر :-هلا يا استاذ ماجد وين الناس
ماجد بروقان :-ههههه يالله صباح خير
بندر :-افا يا النسيب
انعصر قلب ماجد وتذكر اخته وجنونها قال بسرعه :-بندر انا اليوم ماخذ اجازه من الشغل برجع اكلمك بعد ما افطر

بندر :-زين انتظرك سلام
ماجد :-سلام
لبس غترته البيضاء واخذ مفتاحه وجواله ونزل تحت ... مرته البتول في طريقها ونزلت عيونها بالارض قال بصوته الخشن القوي :-مافيه كليه اليوم
ارتبكت :-ا ا ا عنـ عندي اوف
ناظرها بطرف عينه ممكن تكون عيوب البتول واجد لكن الكذب مو منها ...سفهها ونزل وقلبه يتقطع لانه زعلان منها ..
ناظرته البتول ودمعتها في رمش عينها ودها تكلمه وخايفه منه ،يوم صحت من النوم حست بالمصيبه وبهول الي قالته البارح ...
نزل بسرعه ولقى امه كالعاده جالسه تتقهوى ومعها اخوانه الي يصحون يفطرون معها قبل لايروحون دواماتهم "صباح الخير "
الكل "صباح النور "
ماجد وهو يجلس :-زين اني لقيتكم هنا
فارس :-خير ان شاء الله
مشاري :-خير
ماجد بسلطته المعتاده :-انا قررت يكون زواج البتول وبندر بالصيفيه الجايه
ناظروا العيال في بعض ...
قال ماجد وهو رافع حاجب :-انتم اخوانها مثلي ورايكم مهم
قال مشاري :-لا يا ماجد انت اخونا الكبير والي تشوفه سوه ماعندنا مانع
قال فارس :-صادق مشاري انت اخونا الكبير والي تشوفه يصير
هز ماجد راسه وانتبه ان امه ساكته :-هاه يا الغاليه وش قلتي ان كنتي ضد تغيير الموعد علميني وماراح يصير الا الي ترضينه
ام ماجد بابتسامه :-يمه مالنا قول بعد قولك
ابتسم ماجد وقال بحنيه :-كلامك يمشي على الكل يمه وانا اولهم
مسكت امه يده وهي تهز راسها ..:-الي تشوفه سوه انا تعبت من اختك
فارس بتعجب :-غريبه ردت فعلها بندر مايتعوض
ماجد بملل :-من يفهم اختك لنا سنتين وحنا بمشادات وهواش في هالموضوع حتى بندر شكل عنده خبر عن شعور اختنا واعتراضها عليه
مشاري طلعت عيونه :-ول هذي مصيبه
ماجد :-لا مصيبه ولاشي دلع بنات ويروح بعد الزواج
العيال:-هههههههههههه ...
وقف ماجد قالت امه :-وين يمه هذا فطور
ماجد :-الحمد لله شبعت وراي موعد مهم
امه :-بحفظ الله
طلع ماجد فتح باب البيت الكبير الا ويحس باحد ورا التفت
رفع حاجب :-خير
قالت البتول وهي منزله عينها بالارض :-سامحني يا ماجد على الكلام الي قلته
ماجد للحين متضايق من كلامها بس مايبين :-صار خير
دمعت عيونها :- لا ماصار خير انا اسفه مايحق لي اقول هالكلام .. انت بمكانه ابوي انت الي ربيتني
قال ببرود والم :-زين انك تذكرتي هالكلام
مسحت دموعها :-متذكرته بس لاعصبت ما اقدر افكر في الي اقوله
ماجد :-بهالشكل ماراح تعيشين مع الناس ..
حمر وجهها من كلامه وتهزيئه لها ..
فتح الباب وطلع لسيارته لحقته البتول وقالت له وهي تضلل عيونها عن الشمس :-ماجد انت جاد في تقريب موعد العرس سنه عن موعده الاصلي
ناظرها بقوه (يمه منه لا ناظرني كذا يكسر عيني وعين أي واحد يتجرا يراده في كلامه )
قال وهو يلبس نظارته الشمسيه :-تعرفيني زين لا قلت كلمه ما اتراجع عنها وان سمعت أي اعتراض ماراح تلومين الا نفسك
وركب سيارته وجحدها ...
وقفت بالشمس تناظر في سيارة اخوها الي ماشيه باتجاه البوابه الكهربائيه الكبيره ...
دخلت البيت بتموت من القهر ...
قابلت اخوانها وعرفت انها لو استعانت فيهم مافيه امل لانهم مايعصون كلمه لاخوهم الكبير وشورهم دايم من شوره ..
طلعت غرفتها يحرقها القهر وقله الحيله حرق مثل اشتعال النار بالهشيم .. شتسوي ياربي تدق على بندر وتهزئه لا لا مستحيل مهما كانت مجنونه كل شي ولا سمعتها وسمعه اخوانها

---------------->>>تابع للفصــــــل الاول

@الجزء الثاني@



>>بيت بو متعب <<
اخذت جود الجوال ودقت على ريووف بنت عمها
ريووف :-اهلين جوجو
جود :-اهلين ريووف اخبارك
ريووف :-انا بخير الحمد لله .. عايشين
سكتت جود شوي حست بشي مو طبيعي من برود ريووف ..
قالت بهدوء :-ريوف فيك شي
ارتبكت ريوف شوي وقالت بابتسامه حزينه :-مافيه شي جديد ..
مسكت جود اعصابها وقالت :-لا تقولين عمة رجلك مرة ثانيه
رجعت ريوف شعرها الاشقر ورى اذنها وقالت وهي تثني رجلينها تحتها :-الله يسامحها
عصبت جود :-الله لا يسامحها ياشيخه ..
قالت بطيبة قلب :-تعودنا
انهبلت جود :-لو مكانك شرشحت هالعانس الي ماوراها شغله الا رمي الكلام يمين ويسار ..
قالت بصوت رقيق كله محبه وشلون مايكون صوتها رقيق وهي بتنطق اسمه :-من اجل عين تكرم مدينه وعشان خالد يهون كل شي ..
تنهدت جود بصوت عالي :-بدينا في كلام الحب
ريووف :-هههههههه ياشين الغيره
عصبت جود :-انا اغار ههههاي لا يمكن حياتي
ريوف :-اعصابك طيب لا يصير فيك شي
جود وهي تناظر في الساعه :-ريووفوه ووجع لازم انام بدري ورانا مسراح بدري
ريووف :-ياي وناسه
جود بحماس :-تعالي معنا بلا سخافه
ريووف بتردد :-والله مدري عن فضوة خالد
تنحنحت جود وقالت بلهجه فيها خبث :-علينا انتي لا بغيتي الدرب مشيتيه
ريووف :-هههههههههههههههههه وجع استحي
قالت ببراءه :- وجعين ماقلت شي انتي الي تفكيرك غلط
ريووف بصوت فيه ضحكه :-انا
جود :- لاجدتي يالله سيو بروح انام وبليز حاولي تجين والله من زمان عن المكاشيت
ريووف مو تايهه عن طبع جود ولا عن حماسها الزايد للطلعه قالت بجد :-عارفه انك تحبين الشي الي يغث ماجد عشان كذا بتتشققين وناسه
طار النوم من عيون جود وقالت بعصبيه :-من قال له
ريووف :-غشيمه عنك انا
ارتبكت جود وقالت :-بصراحه ايه على ايش شايف نفسه ابوي الي المفروض هو كبير العيله والي المفروض رايه يمشي على الجميع ما يسوي شي الا يشوره
قالت ريووف بعقلانيه :-شي طبيعي هذا بدال ماتفخرين بولد عمك تعصبين
ارتفع ضغطها :-افخر بايش يا حظي باستبداديته (لحقت على عمرها) تكفين ريوف لا تزعلين عشاني اتكلم عن اخوك كذا
ريووف :-ههههههههه مازعلت ولاشي انتي بنت عمي ومجبوره اتحملك غير اني اعرف ماعندك سالفه
كنها ارتاحت شوي :-شكرا دايم تحرجيني بذوقك
ريووف :-هههههههههههههههههههه ولكمو
الا ويقاطعها صوت خالد زوج ريوف :-مسا الخير قلبي
قالت بحنيه :-هلا حبيبي ...
ولع وجه جود وصرخت باستهبال:-وجع ريوفوه يالي ماتستحين نعنبو ابليسك توني ما خشيت دنيا عيب هالكلام
ريووف وش الي مخلي جود غير الناس عندها .. غير روحها الحلوه الطاهره لا تعرف الحقد ولا النفاق ولا الاشياء الشينه ممكن تدعي انها ماتحب ماجد لسبب ما ريووف شاكه فيه ... معقول بعد كل الي صار بينهم فيه شعور باقي ما مات ؟؟
مافيه غير هالسبب لسبب بسيط ان جود ماتعرف تكره
طفله في جسد امراه ... ملامح كلاسيكيه وجه دائري عيون ناعسه بشره بيضا وشعر اسود مقصوص طبقات يوصل لنص الظهر .. الي يشوفها مايعطبها 23 سنه يعطيها 18 ،19 سنه ...لجمالها وبراءة مظهرها
قالت ريووف وهي تضحك :-اقطع يدي ان كنتي صاحيه يالله انا بسكر
جود بخبث :-ايه الحين احترق كرتي
ريووف وهي تضحك بصوت عالي :-جودوه
جود تستهبل :-يمه خلاص بسكر سيووووووووو
ريووف :-ههههههههههه سيو
سكرت جود التلفون وجلست تتقلب ساعه في الفراش .. عيا يجيها النوم سبحان الله قبل شوي كانت راح تنام وهي تكلم ريوف والحين طار النوم من عيونها هواجيس وافكار تضايقها تجي وتروح ...
ماجد ماجد ماجد
الناس ذولا ماعندهم غيره .. مالهم الا سيرته .. وش شايفين فيه بالله يوم متشققين عليه هالكثر .. بصراحه ماتشوف فيه زود عن اخوانها
اخ من اخوانها ...
والله انهم قاهرينها خصوصا بندر الي ماوافق على روحتهن البر الا بعد مشورة ماجد ضربت المخده بيدها بقوه من القهر ليش ياخذ رايه شي يقهر ...
ماتدري كم جلست على هالحاله الا وهي نايمه ...

>>> بيت ماجد
صحى ماجد من النوم قبل صلاة الفجر بنص ساعه عشان يصحي اهله يصلون وعلى طول يمشون .. توضى استعدادا للصلاه وجلس على سريره ينتظر الاذان .. عقد حواجبه ووقف وهو يحمد ربه انه ذكر هالشي فتح درجه وطلع منه سلاح الصيد ابتسم بسعه صدر وبال كان وراح يظل الصيد وطلعات البر من احب الاشياء على قلبه نظف سلاحه الا والاذان ياذن للصلاه .. طلع من غرفته وراح لغرفه اخوانه مشاري وفارس عشان يصحيهم للصلاه ...
دق الباب وقال مشاري بصوت كله نوم :-نعم
ماجد بصوته القوي :-قوموا للصلاه
قال مشاري بكسل :-طيب
ماجد بهدوء :-قم وصحي فارس معك
مشاري وهو مدلي يده من طرف السرير :-ان شاء الله
تركه ماجد وراح لغرفه امه الي كان نورها طالع دق الباب..
امه بحنيه وهي على سجادتها جالسه :-ادخل يا ماجد
دخل وهو مبتسم :-كيف عرفتيني
امه بابتسامه :-مافيه احد من اخوانك عنده دم وذوق الا انت انا ادري طالعين على من في دفاشتهم
ماجد :-ههههههههههههههههههههههههههههههههه غريبه هالدفاشه ما اشوفها لابغاني احد منهم
امه باعتزاز :-لانهم يهابونك
كشر :-والله ذي مشكله عمري ماسويت شي يخليهم يهابوني دايم عادي معهم
امه :-هذي هبه من الله مو كل شخص مهيوب ولا كل شخص يحط الله رهبته في قلوب الناس
هز راسه وهو يقول في نفسه /مهيوب مهيوب مهيوب .. لكني مو قريب من احد /
ماجد :-طيب يمه انا طالع المسجد
امه :-الله يحفظك خلاص بنمشي عقب الصلاه
ماجد وهو واقف يعدل شماغه :-ايه ان شاء الله نبي نطلع سيده لبيت عمي ابو متعب عشان نمشي سوى تعرفين مايدل الموقع الا بندر وبندر مو فيه
امه :-وينه ؟
ماجد :-سبقنا للمخيم ..
امه بحزن :-والله انه رجال طيب
ماجد بثقه :-عارف
امه بتردد :-لو البتول تقتنع فيه
ماجد وهو يناظر امه بعيون لابوه اكثر ماهي له :-يمه الكلام في هالموضوع انتهى من 12 سنه تقريبآ بندر بيسوي العرس بالعطله الجايه سواء رضت ولا مارضت انا استعجب (قالها بقهر) قبل كان الموضوع عادي عندها ومن سنتين مسودة لي حياتي بعنادها ودلعها الزايد
امه تحاول تلقى تبرير لسلوك بنتها لكن مالقت ... استاذن ماجد وطلع من الغرفه طفشان وزهقان ...
تذكر اخوانه ومن التعصيبه رجع لغرفتهم وصرخ بصوته :-مشاري فارس
فزوا من اسرتهم متروعين منه قال فارس لمشاري :- ياشينك ورى ماقومتني
مشاري بربشه :-انت الي ورى ماقومتني
فارس وهو يركض يدور ثوبه :-انا عندي دوام ومارجعت الا متاخر
مشاري وهو يلبس ثوبه :-لا انا الي جالس العب ماعندي دوام
فارس بمزاج مقفل :- ها ها ها خفيف دم
مشاري وهو يلقط شماغه :-امش لا يجي يميدنا بالعقال
فارس بدون نفس :-هههههههه اشك في عقلك
مشاري وهو يفتح باب الغرفه :-شعور متبادل
قال ماجد بدون نفس :-لمتى وانا الي اقومكم للصلاه
قال مشاري يستهبل :-مالنا غنا عنك
ابتسم ماجد غصب وقال :-هذا الي فالح فيه وين اخوك
فارس من راهم وهو يرجع اكمام ثوبه من بعد الوضوء :-وراكم
التفت ماجد ، قال فارس :-صبحه بالخير
ماجد "صبحه بمثله يالله بيقيم اخلصوا علينا "
سبقهم مشاري تحت عشان يتوضا .. وطلعوا كلهم سوا
×
بعد ما صلت ام ماجد راحت تصحي البتول لقتها صاحيه ومجهزه اغراضها
ام ماجد :-هههههههه وش صاير بالدنيا اول مره تقومين من بدري
البتول وهي ترفع شعرها ذيل حصان :-اول مره نطلع من يمكن وانا بالمتوسط ماتوقعت ماجد يوافق
قالت امها بلهجه لها معنى :-الفضل من بعد الله لبندر هو الي اقنعه ..
ارتبكت البتول وخرب شعرها وماردت بكلمه
ابتسمت امها وقالت :-عجلي اخوانك على وصول
البتول بوجه مولع :- طيب
ربطت شعرها أي كلام وهي بتموت من التعصيب خير ان شاء الله وش الي صار ولجم لسانها لا يكون بس مصدومه ان فيه احد على وجه الارض يقدر يثني ماجد عن شي ما هو مقتنع فيه .. لايكون بدت تفكر في ايجابياته اكثر من سلبياته الي ترفع لها ضغطها ...
رمت هالافكار عنها هي ماتبيه ماتبيه ولها الحق تختار شريك حياتها بنفسها
وش نقصها عن غيرها ...
رمت فرشه شعرها في شنطتها ... كان باب غرفتها مفتوح قال ماجد وهو مار من عندها" يالله البسي عبايتك مشينا "
ما امداها تلمحه حتى كان زعلان منها رغم انه عادي على طبيعته ماجد العاقل الساكت الي لا تكلم سكت كل من حوله وخلا كلام غيره قدام كلامه حكمته ونبرة صوته ضباب ماله ملامح ولا وزن ولا قيمه ...
ألا إنها تعرفه من نظرته القاسيه ألي كلها جرح من كلامها صحيح إنها اعتذرت وانه تقبل اعتذارها لكن إحساسها يقول انه زعلان عليها ..
مد بوزها من الضيق .. وراحت تسكر الشنط اقل شي تسويه ماتحرق دمه على هالصبح بتأخيرها المعتاد ..

>>> بيت متعب (ابو طارق)
قال ابو طارق لزوجته :-وين بناتك جهزن للروحه
ام طارق :-اسماء جالسه تلبس ومبسوطه وعايشه ماده بوزها شبر ماتبي تروح ونجوى في المطبخ تطبخ مدري وش تسوي
ابو طارق بعصبيه :- محد جالس فاهمه ولا لا ، ابوي رجال كبير ونفسه يجتمع مع عيلته كلها مو نصها
خافت زوجته وقالت :-والله ماقلت شي
ابو طارق بنص عين :-لا انت ابد ماتقولين شي
انقلب لون وجهها وسكتت ...
قال :- قومي نادي بناتك بنروح بيت ابوي عجلي
فزت من مكانها بسرعه وراحت لغرفه بناتها ... لقت اسماء تتزين وعايشه بقميص البيت لسى
قالت بعجله :-ماخلصتن
اسماء بوجه كنه مزهريه ملونه :-انا بخلص
عايشه :-اااااااااااف مابي اروح ودوني بيت خالتي
دخلت نجوى الغرفه وهي تنزل كموم جلابيتها قالت تستهزء :-تتركين اهلك وتروحين للغرب
عصبت امها :-غرب ايش هذي خالتك اختي
نجوى :-ماقلت شي يمه لكن ذولا اهلنا وعيال عمنا
قلبت امها عيونها دلاله ان الكلام ماعجبها وقالت :-والتبن والله
عصبت نجوى وسكتت نفسها تعرف سبب كره امها الي تتقاسمه هي وخواتها لعيال عمهن
اسماء بدلع :-يمممممممممه
امها بضحكه لها معنى :- اغدي في حالك كود الي في بالك يشوفك صدفه ويخطبك
اسماء من قلب :-ااااااااااااااااامين
عايشه ببلاده وهي تاكل فصفص من صباح ربي :-ههههههههههههههه حلوه
حقرتهن نجوى باشمئزاز وراحت تاخذ عبايتها صحيح انها اكبر خواتها وعمرها 25 وماتزوجت لسى الا ان الزواج مو من اول اهتماماتها ومحور كلامها زي خواتها ..
صحيح تتمنى تتزوج وتكون ام لكن عمر الموضوع ماكان وسوسه لانها مؤمنه وفيها دين كثير وتعرف ان الزواج قسمه ونصيب ..
رفعت شعرها الطويل المصبوغ درجات البني بشباصه ولبست عبايتها
قالت اسماء بلهجه ممطوطه :-تعالي هنا صواني الحلا ذي كلها لمن
ناظرتها نجوى ببرود :-انتي في اعتقادك لمن ؟
تفشلت اسماء وقالت لامها :-يمه ان ماخاب ظني بنتك ترسم على واحد من صقور العيله
قالت نجوى باستهزاء :-الله لا يبلاني بالي بلاك فيه
قالت اسماء ببزاره :-وانا شفيني
نجوى بصراحتها المعتاده :-روحي شوفي وجهك ذا الي كنه صحن حلاو العيد وتعالي تكلمي
ام طارق :-خلاااااااااااص نجوى لا تحطمين اختك
نجوى :-احطم ايش يمه وين حنا فيه نسيتوا عاداتنا نسيتوا الدين والشرع وبنتك تتكلم كاني مو متزوجه
انقلب لون وجه امها وقالت :-ليه وش سوينا حنا يوم تقولين اننا نسينا الشرع
نجوى :-مدري عنكم تخططون على فلان وعلان وهذا مايجوز
اسماء بوقاحه :-خليك في دينك اصرف لك واجلسي عند امك طول العمر عانس غبيه
ثقتك نجوى في نفسها مالها حدود ومايهزها احد خصوصا ان كان مثل اسماء
قالت بدلع قهر اسماء:-انتي ناسيه اني مملكه عيوني
اسماء باستهزاء :-مملكه طل لو رجلك يبيك كان يمديكم تزوجتوا مو ملكة 3 سنوات والعرس بح
حزت الكلمه بقلب نجوى وسفهتها
واخذت اغراضها وطلعت من الغرفه قبل لا تكبر السالفه ويتهاوشن ..
قالت عايشه :-اوووووووووف طفش دايم هاوش
صرخت امها :- قومن البسن بسرعه
تجهزن بسرعه وطلعن قال اخوهن تركي بعصبيه :-ساااااااااعه
طبعا تركي اصغر من نجوى بسنه عمره 24 سنه بس خواته يخافن منه موت لانه عصبي مره مو مثل طارق الحكيم الي اصلا يالله ينشاف بحكم عمله طيار وسفرياته واجد
ناظر في اسماء بصدمه وصارخ :_انتي وش صابه على وجهك بسم الله الرحمن الرحيم هذا وجه ينتصبح به من صباح ربي
قال ابوه من وراهم :-تركي علام صوتك واصل لبرى
تركي بقرف :-شف وجه ذي كيف قايل
ماتت اسماء من الخوف ناظر ابوها في وجهها بصدمه وقال بذهول :-بسم الله وش ذا الازرق والاخضر الي حاطته روحي اغسلي خشتك ذي الي كنها خيشة بصل
تحطمت اسماء وراحت تركض لغرفتها ... لحقتها عايشه ...
قالت اسماء وهي تمسح دموعها :-شفتي اخوك وابوك
عايشه بخبث :- هم ركبوا السياره مصدقه عمرك بتغسلين وجهك امشي يالله تغطي ومحد منتبه
طلعت عيونها قدام :-والله وجبتيها ..
عدلت لبسها الي ملون كانها ببغاء فيه وزينت شعرها البرتقالي ولبست عبايتها وتغطت .. طبعا عايشه موب احسن منها بس الفرق ان عايشه ماتحب تحط مكياج ابد وشعرها الاسود الخشن نوعا ما مرفوع بشباصه فوق ..
يمكن احسنهن لبس وترتيب نجوى انسانه رايقه مره ونعومه ولبسها دايم يليق بها ..

@الجزء الثالث@

حطت جود واقي من الشمس على وجهها ويدينها صحيح مافيه شمس قويه والجو معتدل لكن هذي هي عاداتها وشمس الرياض ما تنظمن ساعه حر مره وساعه براد ...
لبست بنطلون جنز ازرق وبلوزه بيضاء وسوت شعرها جديله ثم لبست عبايتها الي مسكره من قدام حتى ما يبين لبسها اذا مشت او تحركت .. ولولا انهم طالعين بر مع اهلهم ماكانت لبست كذا
طل يزيد عليها وهي تجمع اغراضها :-هاه ما خلصتي
جود:- الا خلصت (قالت تمصلح ) يزوووووووودي حبيبي
يزيد وهو مكشر :-ماتعرفين تتمصلحين خير
قالت بابتسامه تشق الحلق :- نزل لي شنطتي
يزيد :- شغال عندك انا
جود تستهبل :-لا انت الخير والبركه بس يرضيك اشيل شنطه واطيح وينكسر عصعصي
يزيد :- ههههههههههههههههههههههه وما تتزوجين وتقعدين عله على قلوبنا لا ياشيخه اشيلها واشيل امها بعد
جود وهي تمد لسانها :-عله على قلبك ..
يزيد :-ههههههههههههه الله يعيننا
جود :-يزيدووووووووووووووه ...
الا وابوها يدخل بما ان الباب مفتوح :-شعندكم يا عيال
حبوا راس ابوهم وصبحوا عليه ..جود :-سلامتك يبه تعرف يزيد يحي يرفع ضغطي من الصبح
يزيد :-وجع قلبت السالفه علي
ابوهم بابتسامه :-يالله ماودكم تنزلون .. نبي نمشي ..
جود ويزيد :-ابشر يبه
ونزلوا العيال ورى ابوهم وهم يدفون في بعض ويتهاوشون بصوت واطي كنهم بزران ...
دق جوال ابوهم وطلعه :-الو
الوليد:-صبحك الله بالخير يبه
ابوه :-هلا هاه جبت الذبايح والاغراض الي موصيك عليها
الوليد :-ايه الذبايح معي وباقي الاغراض راح عمر يجيبهم
ابوه :-انت تعرف عمر بربوس ماهو بجاي الا تالي الليل
الوليد مسك نفسه لايضحك معه حق ابوه عمر لاراح في درب ابطا قال ابوه يكمل :-انت وينك الحين ؟
خلاص مابيني وبين المخيم الا ساعه ..
عصب ابوه :- مهبول انت كم ماشي
الوليد ببراءه :-السرعه القانونيه يبه ؟
ابوه يستهزء فيه :-السرعه القانونيه وان اسمع صوت جرس السرعه هد ترى الطريق الي انت فيه صحراوي يمكن يطلع لي بعير منا ولا منا
الوليد :-على خشمي تامر بشي
ابوه :-لا
الوليد :-سلام
سكر ابوه الجوال وقال لام بندر :-وين ندى ماشوفها
طلعت ندى من المطبخ بابتسامه :-هنا يبه امر
ابوها:- مايامر عليك ظالم يبه لاتنسين علاجاتي
ندى بحنيه :-ولو يبه انسى عمري ولا انسى علاجك حطيته بالبراد وباخذه بنفسي بالسياره
ابوها :-بارك الله فيك يبه بشريني وش اخبار تجهيزات العرس
استحت مره من ابوها وولع وجهها قالت وراسها بالارض :-زينه يبه بالاذن ..
وهجت بسرعه تلقط وجهها ...
جود :-ههههههههههههههه اموت على الحيا حبيب الالب وينه

ندى بهمس :-انطمي وجع لايسمعك واحد من العيال ويحوسك وانا معك
جود :-هههههههههههه خوافه
ندى :-عندك مانع
جود :-عني دواس ههههههههههههههههاي
ندى :-الشرهه مو عليك على الي يكلمك يالبزر
جود :-انا بزر يالمشيبه ترى مابينا الا سنه
ندى :-قرويه ماعليك شرهه ولا وش يفهمك بالصبغات
جود :-قومي انقلعي المهم ماتدري عن خواتنا المعرسات بيجن ولا لا
ندى تستهبل :-توام اخونا الوليد المدام اريام بتجي والاخت امال ماتدري تعرفين هالاسبوع اخر اسبوع لامتحانات المدارس ولدها عنده امتحانات ...
جود :-ايه صح حسبتهم نفس حالتنا معطلين
ندى تبي تقهرها :-احسدك على ذكائك
جود :-حسوووووووووده
الا واريام تقاطعهن :-لا اله الا الله ماتتركن المحانك انتن
صرخت جود :-ريوووووووووووووووووووووومه
وضمت اختها قالت اريام :-وجع بشويش بتموتين ولدي انتي
جود بحركه عفويه :-يوه نسيت انك حامل
ندى :-هههههههههههههه وخري هناك بسلم على اختي
جود بحركات بزران :-كليها واشبعي بها بعد
تذكرت ندى :-الا وين رجلك ؟.
اريام وهي ماده بوزها :-اخونا الغبي عمر مسكته الشرطه لانه قطع اشاره وراح سلمان يكفله
جود بتكشيره :-يوم خربت الروحله
طبعا كانن يتكلمن بصوت عالي وهن بالصاله وسمعهن ابوهن وقال :-لا خربت ولا شي البسن عباياتكن بكلم واحد من عيال عمك يجون يودونا
انقبض قلب جود :-يبه ورى مايودينا السواق
ناظرها ابوها ذيك النظره الي خلى خواتها يمسكون انفسهم لايضحكون على شكلها
قالت جود تصرف :-نعم يمه جااااااايه
وراحت تركض للمطبخ بعد طيحة هالوجه لان امها مانادتها ولا يحزنون ..
قالت امها وهي تناظرها :-جود شفي وجهك احمر فيك شي يمه
جوود تصرف :-لا ابد يالله مشينا
امها وهي تهز راسها :-الله يهديه اخوك عمر مالقى يخربها الا اليوم
جود وهي تناظر في الشغاله وهي ترتب ترامس القهوه في السلال :-يمه هذا عمر وهذي طبوعه شنسوي يعني ..
امها :-الله يهديه ...
جود :-امين ..

>>>>بيت ماجد..
سكر ماجد جواله وقال ودق على جوال مشاري
ماجد :-الو سلام
مشاري :-هلا ماجد
ماجد :-اسمع انت وينك ؟
مشاري :-ويني ياحظي انا سبقتكم للمخيم معي اماني وريووف
ماجد ماحب يقول له عشان مايشغله عن السواقه :-رحتو بعيد
مشاري وهو ينزل شماغه جنبه ويشغل مكيف السياره :-ايه حنا بمنطقه ..........
ماجد عرف ان مافيه مجال يروح مشاري لبيت عمه :-زين يالله مع السلامه بس حبيت اشوف وينكم
عرف يلف السالفه زين عن مشاري النشبه
سكر الجوال وراح يدور فارس لقاه جالس يشيك على كفر السياره ومنشغل .. الظاهر لازم يروح هو بنفسه
قال لفارس اسمع انت اخذ امي والبتول واسبقونا للمخيم راح نتقابل بعد ربع ساعه في .......فيه طريق مختصر بمنطقه عمي يخلينا نلحقكم ..
فارس عقد حواجبه :-وانت ؟
ماجد وهو يرجع شعره بيده :-انا بودي عمي واهله
طبعا عمهم اعور والعين السليمه نظرها مره ضعيف ويتعب من السواقه ولازم احد يسوق به في كل مشاوريه لان عياله تأدبوا من عقب الحوادث الي صارت له بسبب النظر الشبه معدوم عنده .
فارس :- وين العيال ؟؟ عمر والوليد..ويزيد
ماجد وهو ياخذ شماغه من سيارته الي موجوده بموقف سيااراتهم الكبير :-مدري هو كلمني وقال ارسل له مشاري ومشاري معه البنات وسبقنا بواجد مقدر ارجعه
فارس بشماته :-ههههههههههههههههههه بيموت من القهر لو يدري وش فوت
ابتسم ماجد وقال له :-لا تسرع
فارس :-ابشر
وطلع فارس مفتاح سيارته الكامري 2006 وعطاه لماجد لانهم بيرحون على سيارة ماجد الكابريس 2006 ..
ركب ماجد سيارة فارس وراح لبيت عمه ...
،
،
،
بعد عشر دقايق وصل ....
لقى يزيد واقف برى ينتظره .. رمى عليه السلام
قال يزيد :-بفتح لك بوابة السيارات عشان تدخل السياره
ماجد :-زين
فتح يزيد باب السيارات ..ودخل ماجد السياره ونزل .. عطاه يزيد مفتاح الجمس وركب ماجد وطلعه برى .. ثم نزل
ربط شماغه زي الحمدانيه الاماراتيه ماله خلق يشيل العقال مدة ثلاث ساعات تقريبا لبس نظارته الشمسيه ووقف ينتظر عمه يطلع ...
مشى بسرعه وحب راس عمه :-صبحك بالخير
عمه :-هلا يا ولدي ليش متعب عمرك ورى ما ارسلت واحد من العيال
ماجد بابتسامه :-تعبك راحه ياعمي يالله صار لهم فايضين من الصلاه نص ساعه تاخرنا
عمه :-الحق معك وانا ابوك (التفت يم يزيد) رح ناد امك وخواتك
يزيد بسرعه:-ابشر
ودخل يناديهم ..مشى ماجد مع عمه لين ركب وسكر الباب وراه والتفت راجع ..قبل لايركب سمع صوت ناعم يهبل :-تو ما انور الحي
انصدم ماجد مو معقوله ماتوقعها من بنت من بنات عمه ..
انهبلت ندى وهي تشوف مشاري قدامها يا زينه هو وحركة شماغه ...
قالت جود بهمس لكن ماجد سمعها :-استحي على وجهك عيب
ندى بنعومه وكنها تكلمه هو مو اختها :-عيب ايش مشاري رجلك صح ولا لا
ماقدر يمسك نفسه ابتسم وهو معطيهم جنب وجهه ومنزل راسه ، رفع راسه والتفت يمهن طلعت عيون ندى قدام من فتحة برقعها ورجعت تغطت امحق لها ساعه تخبص من هالكحول تحسب مشاري هو الي يوديهم واخر شي طاحت لها في مطب قوي بالحيل ..ومع مين مع ماجد يا خزياه بيشره عليها
شهقت جود بقوه وعطتها ندى كوع في بطنها
قالت ندى ترقعها :-صباح الخير ماجد كيف حالك؟؟
ابتسم وقال وهو مدنق :-بخير عساك بخير شخبارك يا ندى ؟؟
على الاقل عارف منهي اشواااااا شي ارحم من شي ...
قال وهو ماسك نفسه لايضحك من ارتباكها :-مشاري لو موجود كان جا يوديكم
فهمت ندى تلميحه انه فاهم انها تحسبنه اخوه قالت تبلع ريقها :-انت الخير والبركه
وركبت السياره طوالي ووجهها طايح ع الاخير ...
قالت جود تهمس :-وجع ان شاء الله فضحتينا
همست لها :-يوم انك فالحه ورى ماقلتي لي انه ماجد مو رجلي
جود بعصبيه وتوتر وقلبها بينفجر في صدرها :-انتي تخلين احد يشوف تهبدين ماتعطين احد فرصه
ندى فيها صيحه من الفشله :-لا يكثر بس ..
جود مرتبكه على الاخير :-فالحه وخري بركب بالمرتبه الثالثه
ندى بقهر :-جودوه اقعد بلحالي يعني
جود :-تعالي معي انا بقرا الصراحه مالي خلق ارتز كني سكني قدام مغيمين الجمس ليه عشان نصور معه .
مسك ماجد نفسه بصعوبه لا يضحك بكل صوته بنت عمه ذي مخروشه ولسانها متبري منها.
لكن البسمه ماتت ...
ركب يزيد معهم قدام وركبت اريام وام بندر بعد مارموا السلام ...
قال ابو متعب لماجد :-اقول وانا بوك متى بتتزوج
ماجد بابتسامه :-ناسي اني متزوج ياعمي
ابو متعب :-ههههههه لا وانا عمك انت فاهم قصدي
ماجد وهو يسند ظهره لكرسي السياره :-ان شاء الله لين تتزوج البتول واتطمن عليها
عمه :-البتول ان شاء الله بتعرس بعد شهرين ماعاد لك عذر
سكت ماجد

كمل عمه :-ياولدي العمر يركض وأنت مملك لك سنين
قال ماجد وهو يناظر في عمه :-الرأي رأيك ياعمي والشور شورك
عمه :-ياولدى إلي بيعرس أنت موب انا
ماجد :-ههههههههههه عارف ياعمي خلاص الله يقدم الي فيه الخير
عمه :-الله يوفقك ويرزقك كثر برك وطيبك
ماجد :-تسلم يا عمي
طبعا الانسه جود كانت بالمرتبه الثالثه وفالتها منزله طرحتها وفاتحه لها كتاب لها ساعه وماقرت حرف واحد
ما كانت تدري ان ولد عمها من قريب كذا روعه شويه فيه ... لا ومسوي حمدانيه اماراتيه بشماغه ياويل قلبـي ...انقبض قلبها واااااااااااااااااااه منك ثم اااااااااااااااااااه ماغبت عن بالي لا ليله ولا يوم
عضت طرف الكتاب بقهر شوي ودمها يسيل ياحظ بنت شيخوه فيه ...انتبهت لعمرها ورجعت تقرا..غصب غصب لازم تقرا هالروايه الي كرهتها من قلب لانها فكرت فيه وهي ماسكتها بيدها ...
مر نص ساعه قال ابو متعب لولد اخوه :-عطنا من قصيدك الزين مبطين عنه
ام بندر والي تعز ماجد من معزتها لعيالها :-ايه وان امك سمعنا شي من شعرك الي يشرح القلب
ماجد :-هذي قصيده الفتها من ثلاث سنين ...
يزيد بحماس :-ماقد نشرتها
ماجد بضيق لكنه ابتسم :-لا خاصه ما نشرتها
يزيد :-يالله هاتها ترى كل قصايدك حافظها وبعرف ان كانت قد نزلت ...
ماجد بلع ريقه وقال بالقاءه الي يهجد كل من حوله حماس ورغبه في سماع كل حرف وكل كلمه وكل تعبير ...

انا والليل والعبرة وجرح وخاطر ٍمكسور
ونفس من هجير البعد والحرمان مقهورة

وقلب ظامي لشوفك ولايروى ظماه بحور
وعين تحتري لحظة غياب الطيف وحظوره

ونار تنطفي مره ومره تشتعل وتثور
واقول النار مقدورة وهي ما هيب مقدورة

حسبت الليل بغيابك يمرن الليال دهور
وكني شايل بقلبي ليال الوقت وشهوره

تصبرت وتقدرت وبنيت من الخيال قصور
إلين ان الجفا شد الركايب وانتهى دوره

تحريتك على درب القصيد من ثلاث دهور
وحشا ما مات لك غصن يشف الماي بجذوره

تخيرت الغرام وجيت لا راضي ولا مجبور
وجيتي تسبقين خطاك مرضيه ومجبوره

وانا ما كان لي رغبه أبين واكشف المستور
ولكن الجمال أكبر من الخفاق وشعوره

جمال وود وعيون ودلال وكبرياء شعور
وفتنة تخذل عيون النهار وينطفي نوره

ولك في خافقي صوره تلاشت بين ضي ونور
وأخاف اسكت من الفرحة وتنطق باسمك الصورة

عرفتك وانتهت رحلة قساوة دربي المهجور
والا يا جملة أيام الجفا والصد مشكورة

خذتني للجفا عزه واخذني للعناد غرور
واخاف اكون بعنادى حبيب ومات بغروره

وإذا كانت مسافات الخيانة للغرام قبور
وش اللي يجبر العاشق يخون ويحفر قبوره؟

وش اللي يجبر الشاعر يدور للشعر جمهور؟
مدام انتي محبينه وعشاقه وجمهوره
غمضت عيونها بقووووووووووووه وخلت دمعها يسيل ويسيل ....
مايدري كيف جاله قلب وقال هالقصيده بوجودها ولكن لابد بشي من التنفيس تعب تعب تعب من الكبت ...
لمن كتب الشعر وابدع به ...؟؟ مافيه غيرها
لكنها اختارت وهو بعد اختار !!

(الفصل الثاني )
×>الجزء الاول <×
@@@@في السياره ..
قال ابو متعب :-الحين المكان انت متذكره ولا شلون
فهم ماجد عليه وقال :-ايه اذكر ان هالمنطقه زينه لكني جيت بنفسي قبل ايام واغلب المخيمين عوايل وينعدون على الاصابع يعني مكان مناسب لحريمنا ويقدرن ياخذن راحتهن..
هز عمه راسه رضا على تصرفات ولد اخوه الي حنكه بيدينه وهو صغير وطلع رجال والنعم فيه .
ناظر ماجد في يزيد ووجهه الاصفر :-يزيد اخذت علاجك
كشر يزيد مايبي احد يجيب سيرة الدواء المقرف الي ياخذه
قالت امه :-يو يمه ليش ماذكرتني انت تعرفني نسايه .
يزيد بضيق :-ياليتك نسيتي
قال ماجد بقوه رغم انه صوته ما ارتفع عن طبيعته درجه وحده :-الي معك القلب مو لعبه خلك رجال واخذ علاجك
سكت يزيد ومارد واخذ علاجه لاني مايبي يضيق خلق امه وابوه ..
دق جوال ماجد ورد :-هلا ..زين انا اكلمكم بعدين
ضرب عرق في راس جود ونطت عند راس ندى الي جالسه قدامها قالت بصوت واطي مره :-ندوش تهقينها تكلمه
طلعت عيون ندى قدام وقالت بهمس :-وجع انطمي وانا شدراني
تفشلت جود من لقافتها وقالت :-يختي سؤال برئ ..
ندى :-تلعبين على مين انتي انسي انسي تراه ماخذ بنت اخوك يعني محرم عليك
طعنه ..
طعنـه..
طعنــه..
في صميم القلب ..
سكنت وهجدت ..وخفقات القلب تلاشت ولا كنها كانت واستفاضت وهاجت قبل لحظات .. لحظه بس لحظه عاشتها بدون مكابره والنتيجه صدمه الواقع تهزها هز..
كلام ندى زي الضربه الي جت قويه على الصدر وخدرت كل الاحاسيس من قوة ألمها ..زي الي يتوجع والالم تعدى الجسد وتوغل في الروح ..
رجعت ورى لكرسيها ونزلت دموعها وهي كابته شهقتها بيدينها الثنتين عشان محد يسمعها ودها تصارخ تبكي تبكي ..تترجاه تعتذر منه اخطت عليه واخذها الغرور بمحبته لها وتاليتها خسرته وياليت من بعد الخساره فيه امل ..لا الخساره جتها مزدوجه فزود على انها خساره مات الامل واحترق واستحال رماد للابد .
قال ابو متعب لماجد السرحان الي ماسك الدركسون بيد واليد الثانيه مسندها لباب السياره ..:-غريبه ماشوف عزبتك معك
ابتسم ماجد ذيك الابتسامه الي تقلب ملامح وجهه 180ْ ولانه يعرف عمه ويفهم مقاصد كلامه حتى اكثر من عياله قال :-ههههههه لا مانسيتها لكنها مع فارس
ابو متعب بابتسامه جعدت وجهه اكثر :-انا استغربت يوم ماشفت سلاحك معك
ماجد :-ههههههههههه بعذرك يا عمي ماقد طلعنا بر الا وهو معي
قال عمه وهو يتذكر :-الا على طاري فارس وين قال انه فيه
ماجد :-راح يوصلون بعدنا بربع ساعه ماعليه فارس يخبر هالمنطقه زين لانه يخيم احيانا مع خوياه هنا
ابو متعب :-ايه اشوا بس قل له ينتبه الارض ممطوره ماشاء الله لا يطيح له في بركة مويه
ماجد :-قلت له ينتبه ماعليه الوالده معه ماهي تاركته فحاله هههههههه
ابو متعب :-ههههههههههههه
/
/
/
/
في المخيم@@@@@@@@
مشاري وخواته لهم ساعه واصلين والوليد وصل بعدهم بدقايق وذبحوا ذبيحه وجهزوا الفطور وشبوا النار وحطوا الدلال عليها وكل شي جاهز بس ينتظرون العيله توصل ..
بعده بربع ساعه وصل ماجد والعيله ووراه كان فارس وامه واخته .
نزل ابو متعب من السياره ومعه يزيد بقى ماجد بالسياره يشغل جواله الثريا لان المنطقه الي هم فيها ما تشتغل فيها الجوالات العاديه ..نزلت ام بندر واريام وندى الي كانت مستعجله تبي تشوف مشاري قبل لا يروح يعني فرصه اما بالنسبه لجود كانت غافيه بالسياره وانتبهت للهدوء الي حولها بسبب صوت ماجد وهو يلعن الجهاز الي معه جلست بسرعه وشافت الجمس فاضي احترق وجهها وبردت عظامها جمعت اغراضها وحطتها بشنطتها الكبيره وحاولت تنزل ..في هالوقت نزل ماجد من السياره ودنق يبي يزين شي بمرتبته الي كان جالس عليها ، من العجله والرباشه دخلت عباية جود في مكان ونشبت فيه وهي ما انتبهت الا يوم جت بتحط رجلها بالارض الا والعبايه تشد عليها بتطيحها على وجهها صرخت صرخه خوفت ماجد وانتبه لها ترك باب سيارته مفتوح عشان محد ينتبه له وهو يساعدها ما يبي يجيب لها المشاكل "دقيقه "
شب وجهها نار وضرب قلبها ضرب لو جا قدام الطبول نافسها ..
كانت العبايه شاده عليها وتخنقها حاول ماجد يفكها بس مافيه امل والبنت تختنق ماقدر يتحمل مسك العبايه وبكل قوته قطعها وقبل لا تطيح مسكها من ذراعها لا تطيح على وجهها بسبب الموقف كانت اعصابها بتنفجر وبسبب قربه منها زاد حالها سوء والطيحه كملتها نفضت يده وهي تحس ودها تبكي بقوه وترتجف وحالتها حاله قالت بدون شعور :-وخر عني وش سويت أنت خربت عبايتي توني شاريتها جديده مكلفتني واجد
تغير لون وجهه هذا جزى إلي نسى نفسه وجروحه وجا يساعدها قال يستهزء :-أيهم أهم حياتك ولا عبايتك
ومشى وتركها لأنها إن مشت قبله بيبين لبسها لان العبايه صايره قطعتين منفصلات وهي ماسكتها بكل قوتها وكأنها بتموت إذا تركتها ..
ناظرت فيه ونزلت دموعها لأنها شافته يروح لمجلس الحريم عشان يسلم على جدته أم أبوه (ام صالح) وكانت نجوى واقفه عند الباب تبتسم له رمت عبايتها وشنطتها بالسياره وركضت تبي تختفي قبل لا يشوفها احد ويتشمت فيها ما تتحمل ما تتحمل كرامتها فوق كل اعتبار ركضت ماتدري وين وجهتها بس اهم شي تبعد عشان تبكي براحتها وترتاح حتى ترجع قويه وتقدر تتحمل بنات اخوها من ابوها وامهن الحيه والاهم تقدر تتحمل شوفة من حرمتها من ماجد ...
ناظرت في الساعه ولقتها 8 الصبح غريبه مافيه شمس قويه كان الجو مره حلو وكان فيه ريحة مطر المكان كان روعه نفود وعشب ووناسه والاهم ارض فاضيه يعني حريه شخصيه للي يبي يتمشى ويوسع صدره ..
مسحت دموعها وغسلت وجهها بقارورة المويه الي معها من اول مامشوا من بيتهم ...
رفعت راسها للسما وهي تشوف رشاش مطر خفيف ابتسمت من كل قلبها كان جو ولا اروع ..شي يبث التفاؤل في قلبها لكن وش فايدة التفاؤل لما نرجع لواقع يقتلنا ويألمنا

خذتني للجفا عزه واخذني للعناد غرور
واخاف اكون بعنادى حبيب ومات بغروره

وإذا كانت مسافات الخيانة للغرام قبور
وش اللي يجبر العاشق يخون ويحفر قبوره؟

وش اللي يجبر الشاعر يدور للشعر جمهور؟
مدام انتي محبينه وعشاقه وجمهوره

رجعت الدموع بقوه وكانها نار تشتعل في هشيم تحرق روحها معها ..
اه ثم اه ثم اه
ليه يا ماجد ليه ...؟؟
ليه اخذت عزتك مني ماقصدت ماقصدت ماقصدت وش الي سويته تزوجت بنت اخوي خليتني محرمه عليك لابد الابدين ..
حست بشويه برد وفكت شعرها الطويل عشان يدفي رقبتها شوي ..
جلست على الارض وضمت ركبها لحضنها وهي تشوف كآبة حياتها تتصادم مع روعة الجو ..
×قلي يا زمن وش باقي حزن تخفيه!!×
&
&
@@@@بالخيمه
قالت جدة ماجد لنجوى :-يمه روحي اجلسي جنب رجلك موجنبي
طاح وجه نجوى مره ونزلت راسها ووجهها احمر .. استغلت امها الفرصه وقالت :-ايه جدتك صادقه ..
حست بقلبها بيطلع من محله وقالت بهمس :-لا بجلس جنبك يا جده
ضحكت جدتهم الكبيره بالسن والمريضه :-يوه من دلعكم يا شباب هالزمن
ابتسم ماجد وقال :-لا تحرجينها يا جده (قال بيغير السالفه) الا القهوه الزينه ذي من مسويها
قالت ام طارق :-ذي نجوى من فجرية ربي وهي ناشبه في المطبخ تشتغل
قالت بحيا :-يمه
قال ماجد بابتسامه حنونه :-الله يسلم هاليدين
حمرت خدودها :-صحه وعافيه
ماجد :-يعافيك ..
قالت ام ماجد بابتسامه :-لك نفس يمه في الطبخ ماشاء الله عليه فنان
قالت نجوى وهي تناظر عمتها ام زوجها :-صحه ياعمه
"وخري عني دوري بشوف"
كانت عايشه واسماء مرتزات عند واحد من بيبان الخيمه المسكره ويقزن ماجد من الفتحات الي بالجوانب ..
قالت عايشه :-اف منك شوفيه واشبعي منه
اسماء :-اشبع ما اقول الا مالت على حضوضنا الطين
عايشه :-ههههههههه أي والله وانتي الصادقه
اسماء :-اقول عايشه ما تلاحظين انها غريبه انهم ماتزوجوا لسى
عايشه بغباء:-مو هو يقول مايبي يتزوج الا عقب زواج المدلعه الماصخه
قالت اسماء بكره :-قصدك البتولوه
عايشه :-ايه ماغيرها ...
اسماء :-ماظنيته يا عايشه يعني لو تزوج باختنا وش بيصير للزفت ذي احساسي يقول لي انه مايبيها
عايشه وعيونها طايره قدام :-مجنونه انتي شلون مايبيها ليه حرمه هو ينغصب
اسماء وهي تتنهد من قلب :-الا رجال ونص بس مدري احس فيه نظرته لنجوى شي حزن او فراغ مدري

عايشه :-قومي فارقي الافلام الهنديه مآثره عليك
اسماء :-الشرهه مو عليك خليني املي عيني ابرك لي
عايشه وهي نازله تقز من تحت :-هههههههههههه بالله شوفي نجوى الهبلا عيونها بالارض
اسماء :-ههههههههههههه يختي اختنا ذي طالعه هبلا على مين
عايشه :-هههههههههههههههه مدري
وقف ماجد وقال بهدوء :-انا بروح لخيمه الرجال تجين يا جده معي
جدته :-والله يا وليدي رجيلاتي ماتساعدني خيمتكم بعيده شوي
ابتسم وسكت مشى للباب وقال :-نجوى
رفعت راسها وقالت بلهفه :-سم
ماجد تحامل على نفسه وقال :-تعالي شوي
قالت جدته :-يوه اثرنا عذال
ماجد :-هههههههه محشومين ياجده
طلعت نجوى وهي تعدل جلابيتها الحلوه تمنت لو فكت شعرها بدل رفعه شنيون كذا وقفوا عند سيارته وقال :-كيف حالك
شوي وتطير من الفرحه كانه حس بحاجتها له وان هالدقايق الي جلسها ما كفتها ولا ارضت شوقها له قالت بابتسامه :-تمام انت كيف حالك
ماجد :-بخير ..
ناظر في ملامح وجهها الناعمه الراكزه ماشاء الله عليها عيون عجيبه لكن ليش يحس بنفسه كلما طال الوقت انه متضايق ومو فرحان ..ليش؟؟
جواب هو يعرفه بسبب مرض اسمه جود استبد بكيانه وجلس ينهش بروحه ووقف حاجز منيع قدامه وقدام أي بنت ثانيه
قال وهو ياخذ جواله :-يالله تامرين بشي
كانه لمح ومضة حزن بعيونها
قالت بضعف :-اجلس شوي بدري
قال بابتسامه وهو يزين ربطة شماغه :-مره ثانيه ان شاء الله ، يالله سلام
ومشى وما التفت جهتها لو التفاته وحده ..حس بضيق يفوق الوصف لكنه كبته ومشى لين وصل لخيمة الرجال ..لقاهم حاطين الفطور سلم على ولد عمه (متعب) وعلى ولده تركي وجلس اكل لقمتين وبعد القهوه والشاهي انفضوا الي نام والي راح يمشي والي راح يشوف تجهيزات الغداء ..والي جالسين يسولفون ..
فتح ماجد باب سيارته واخذ سلاح الصيد بيده كن الجو بدا يبرد اخذ معه جاكيته الطويل ولبسه ...
قال له عمه :-الله الله بالصيد الزين
ابتسم وقال :-والله يقولون الصيد هنا زين
عمه :-اجل الحق عمك بارينب يشتويها بدل هاللحوم والشحوم
ماجد :-هههههههههههه ابشر وبدل الارنب عشر كم ابو متعب عندي
ومشى ماجد مسافه وشاف له ذيك الارنب ولانه لا رمى مايخطي ابد بطلقه وحده ذبحها ..راح لها وذبحها بالسكين واخذها بيده...
فزت جود من مكانها بخوف ورعب ماحسته في حياتها هذا طلق نار ...
ماتت من الخوووووف دورت جوالها وطلعته لقت مافيه ارسال طلعت عيونها قدام من الخوف ..
إلا وطلقه ثانيه نقزت من مكانها وتجمعت بعيونها الدموع المصيبه أنها ماتذكر وين مكان مخيمهم ..وش هالمصيبه إلي طاحت فيها
أرهفت سمعها إلا وصوت مشي التفتت تدور مكان تتوزا فيه لقت الأرض صحرا ممتده ولا شي يقدر يحجبها عن النظر ..
رحتي فيها يا جود يا بنت الأصل والفصل ضاع مستقبلك وانتهت حياتك ...
كأن خطواته تمشيه مسيره مو مخيره ..شي قبض قلبه وخلاه ينبض وكأنه بينصدم صدمه بتهزه هز ...
مشى ماجد الا هو يوقف مكانه مصدوووم من ذي الي واقفه لابسه جنز وبلوزه بيضاء وشعرهاااااااا اه عذاب ..
تعوذ من ابليس وتنحنح
تجمدت مكانها وشوي ويغمى عليها ..قال ماجد بهدوء :-يا بنت روحي لاهلك المكان ذا فيه شباب وعوايل
ماتت في جلدها ماااااااااااااااااااااجد ماتدري هي تفرح ولا تتمنى الموت ولا يشوفها كذا ...
استغرب ماجد من هالادميه الي ماتحس على دمها ياترى هي ادميه ولا بسم الله ابتسم وقال :-انتي انس ولا جن
عصبت "جن بعينك"
قالت وهي تلتفت :-انا جود
انصدم ماجد وقست ملامحه عصب بقوووووه وقال :-وش تسوين هنا صاحيه انتي ولا مجنونه
نزلت عيونها بالارض وهي ترتجف من الخوف والفشله والظروف الزفت الي حطتها بهالموقف ...
جا لمها وهو واصل اقصى مراحل التعصيب صرخ :-ماتردين ليه يا بنت عمي ردي ليش انتي هنا ؟
قالت بعصبيه :-ضيعت الطريق
سمع اصوات قريبه منهم اصوات شباب انقلب لون وجهه وتمنت جود لو تموت وترتاح ...
رمى سلاحه وصيده وقال وهو ينزل الجاكيت :- خذي البسيه
اخذته منه وهي شبه مخدره
نزل شماغه وقال :-لفيه على راسك بسرعه
جمدت من البرد والخوف ولفته وتلثمت به ...
قربوا لمهم الشباب وهم يقزون جود رد ماجد السلام وهو يقرب منهم عشان تكون جود بعيده عنهم ..
قال واحد وهو يقز جود :-اشوف الصيد وافر هالايام
رفع ماجد راسه ومسك اعصابه وقال :-ايه وافر
قال الشاب :-صيد عن صيد يفرق !
ضحكوا خوياه من معنى كلامه ...
حمد ماجد ربه ان سلاحه به رصاص ..قال بعصبيه :-تسهلوا ابرك لكم
قال واحد منهم جثه وشكله مقزز :-وان ماتسهلنا نسيت المثل الي يقول الكثره تغلب الشجاعه
قال ماجد وهو يقرب منه ويتحداه :-نسيت المثل الي يقول احذر الحليم اذا غضب
صفروا الشله من كلام ماجد وكانهم يحقرونه ...
بلمح البصر رمى ماجد طلقه جت من جنب وجه اول واحد كلمه وقال :-هالمره تحذير والجايه بين عيونك خذ شلتك وتسهل ...
حست جود بنفسها راح يغمى عليها توقعت الولد تفجر راسه طلع ماجد يبي يخوفه بس ...
التفتوا يم بعض وعرفوا انه ما يمزح خافوا موت وخصوصا إنهم شلة مظاهر مو رياجيل بحق وحقيق ..ومشوا على طول
قال إلي خوفه ماجد برميته :-ماراح أضحي وعمري عشان وحده .........
كانت كلمه قوووووووووووووووووووويه نسى ماجد نفسه وهدوءه وعقله وثقله مسكه من رقبته وشاله وضرب به الأرض أصدقائه جمدوا من الخوف ماعمرهم شافوا واحد معصب زيه
قال ماجد وهو يصارخ :-لا تتجرا وتفتح فمك بكلمه عن بنات الحمايل يا بن ....... قم انقلع قم لا والله لا أدفنك بأرضك
ووقفه على رجلينه ثم رماه لاخوياه وقال معكم عشر ثواني ان شفت واحد قدام عيني ثورت فيكم ولا يهمني احد ...
شافو الجديه بوجهه وركضوا وماينشاف منهم الا غبرتهم ..
جمد ماجد مكانه وهو يتنفس بقوه رجع شعره بيده وهو يحاول يمسك نفسه لا ينفجر ولا يجيه جلطه ..
سكتت جود ماتدري شتقول ..ماجد بغى يموت بسببها وشرفها بغى يضيع بسببها ..
التفت يمها اخذ سلاحه وصيده وقال :-مشينا للمخيم
مشت معه وهي ماتتكلم بحرف ...توها تدري انها مشت بعيد عن المخيم
قال ماجد بدون مايلتفت لها :-لا تجيبين سيره لاحد عن انك قابلتيني وعن كل الي صار لمصلحتك يا بنت العم
عصبت وقالت بتهور (ماهي بطبيعتها بعد الاحداث الي صارت) :-تهددني يعني
التفت يمها وقال بعصبيه وطبعه يثور :-اهددك ايش مجنونه انتي ولا صاحيه وش بيقولون اهلنا لا شافونا راجعين مع بعض هااااااااه ..انا رجال مايضرني شي لكن انتي بنت والبنت زي الثوب الابيض اقل شي يدنسها
امتلت عيونها دموع وسكتت وهي تمسحها ...
ضاق صدره ماكان يبي يقسى لكنها تستاهل التهزيئ بسبب فعلتها وتصرفاتها اللا مسؤوله ..
نزل مطر قوي عليهم غمض ماجد عيونه هذا الناقص ...
فجاه قال لجود:- وقفي لا تتحركين
ماتت خوف ..وسوت زي ماقال بهدوء طلع من جيبه سكين ونزل الارض بسرعه طش دم على رجل جود نزلت عيونها تحت لقتها حيه صرخت من الخوف ومسكت ذراعه بقوه بدون شعور وهي خايفه لاقصى درجه
قال بحنيه :-ربك ستر لا تخافين الثعابين مو كثيره هنا بس انتبهي لخطواتك وانتي تمشين احتياط ...
انتبهت لعمرها وفكت يدها منه ووجهها طاااااااااااااايح .
هذي الطلعه الي تحمستي لها يابنت صالح كلها ماسي في ماسي ...
ومشوا شوي وقف ماجد وقال :-الخيمه ذيك خيمة البنات روحي لها ...وانا بجي بعد شوي
وقبل لاتمشي قال لها :-مانسيتي شي
طاح قلبها وانتبهت لشماغه وجاكيته ..
عطاها ظهره ونزلتهم ومدتها عليه وقالت :-خذ يا ولد عمي حسافتي عليك تزيد يوم بعد يوم
تصلب وجمد وكملت هي طريقها التفت لقاها تركض شعرها الطويل وراها كنه سحابة صيف ..
×
×
×

(الجزء الثاني)
دخلت جود الخيمه لقت مافيه احد ...الا بدخلة ندى الي قالت بعصبيه :-جود وينك من اليوم
ارتبكت جود وقالت :-رحت اتمشى
ندى وهي من جد معصبه :-تتمشين بلحالك
جود كانت واصله معها قالت :-ااااااااااااف ايه بلحالي ليه فيه مانع ؟
استغربت ندى من رد اختها ...
ثانيه...ثانيتين...ثلاث ...مسكت جود من يدها من فوق وقالت وعيونها فيها دموع :-كنتي معه صح
عصبت جود وصرخت :-ندى احترمي نفسك
قالت ندى وهي شوي وتنهار :-احترم نفسي من الي مفروض يحترم نفسه يا بنت امي وابوي ريحة عطره معك واضحه للكل هذا شي مايختلف عليه اثنين
احترق وجه جووووووود وسالت دموعها وجلست على الارض تبكي ...
طاح قلب ندى واخذتها الظنون يمين ويسار قالت ندى بخوف وهي تهزها :- جود تكفين طمنيني لا تخليني افكر بشي مو زين
قالت جود :-ااااااااااه يا اختي وش اقول
ندى جلست ترتجف قالت بعصبيه :-سوى لك شي
صرخت جود :-حشا ما سوى شي لو الناس مثله كان الدنيا بخير ..ياحسرررررررررة قلبي يا ندى ياحسررررررررررررة قلبي
سالت دموع ندى غصب :-تقولين ولا شلون ...؟؟
قامت جود وقالت لها كل شي صار من سالفه العبايه لين ماوصلها ...
انقلب وجه ندى ازرق وقلبت كبدها من كل الي سمعته بغت تروح اختها فيها لولا ستر ربي ورحمته ...
قالت جود وهي حاطه راسها بحضن اختها :-خسارتي ماتتعوض يا ندى ما تتعوض
مسحت ندى دموعها :-كله مقدر ومكتوب يا جود ارضي بحكمة الله ولا تنسين انتي اخترتي وهو اختار ...
جلست جود تبكي وهي متمسكه باختها :-اخترت الندامه والله
ماتحملت ندى يأس اختها الي تفجر بسبب الضغط النفسي الي مرت فيه :-جود خلاص ما اقول انسي لا اقول ارضي بالنصيب لا تخلين الناس يشمتون فيك لا تخلين المك يصير اثنين الم قلب والم عزه وكرامه قومي بدلي ملابسك لا تموتين من البرد قومي ريحته ما راح تساعد نفسيتك لو مكانك حرقت هالملابس الي شالت واحتوت ريحته ...
سكتت جود ماتدري ندى انها مستحيل تفرط بها لو يكون فيها موتها ..
وقفت واخذت الملابس الي عطتها ياه ندى لبست ملابس دافيه مشطت شعرها .. وعدلت شكلها وراحت مع اختها تقابل المناحيس بنات اخوها وامهم العقربه ...
دخلت جود الخيمه ورمت السلام ..سلمت على جدتها وحبت راسها
قال ام طارق بانتقاد :-وينك فيه من اليوم يا جود صار لكم ساعتين من يوم ماجيتوا ...
قالت جود وهي رافعه حاجب :-اتمشى ليه فيه مانع لا سمح الله
ام طارق تكره جود لانهم كانوا يقولون انها لماجد من سنين غير عن كذا ان جود ماتواطنها في عيشة الله
قالت ام طارق بكره وهي ناويه تركبها الحق (تخليها مخطيه) :-لا مافيه مانع لكن الاصول انك تسلمين على جدتك وعلينا ثم تسوين الي تبين
ارتفع ضغط جود وخواتها حسن بطبعها يبي ينفجر قالت جود :-مخلين الاصول لاهلها ..
قالت ام بندر :-يمه جود عبايتك شفيها منقطعه
انفجر قلب جود وانقلب وجه ندى قالت جود بهدوء :-جيت بنزل من السياره ونشبت بطرف المرتبه ومادريت الا وهي مقطوعه
قالت عايشه بتخلف :-يوه عبايتك غاليه رغم انها عباية راس وعاديه مافيه ميزه
ناظرتها جود باحتقار وقالت :-العبايه للستر ياماما مو للفت الانتباه هذا يسمونه سفور وبعدين قيمتها بقماشها وطريقة خياطتها اذا ماعندك خبر
ابتسمت ندى مايعرف يهجدهن الا جود ...
قالت نجوى تدق :-ذوقي الحلا الي مسويته ماجد تخبل يوم ذاقه
سد الله نفسك يا بنت اخوي ...حتى كاسة الحليب عافته وانسدت نفسها عنها
قالت جود ببرود :-تعرفيني ماحب الحلا يسمن يخلي الواحد كانه بالونه بينفقع
حمر وجه جود لانها ردتها لها بما انها سمينه شوي ...
قال ندى في نفسها "هذا وهي المدينه ، صدق العرق دساس "
قالت اريام :-وش اخبارك يا البتول ..
ابتسمت البتول :-بخير الحمدلله
قالت اسماء بهباله :-من قدها بتعرس بعد شهرين ...
خزتها البتول بنظره وسكتت وظلت جالسه عشان ماتفشل امها في الحريم ...
قالت جدتها :-يمه جود وش صار بالنسبه حامد
قالت ام طارق بلقافه :-حامد ولد سعد
ام بندر :-ايه ماغيره
قالت جود وهي ماسكه كاسها بقوه :-ولا شي ياجده أظنك عارفه قراري
قالت نجوى والغيره تطحنها طحن :-لمتى يا اخت ابوي وانتي ترفضين الزواج الناس بيتكلمون ترى
جود مو طايقتها خلقه وزود عن كذا جالسه تدقها بالحكي
قالت جود :-موب ازين من اني اتزوج وانلطع محد يعبرني
انقلب لون وجه نجوى ولان الكلام في مجمله عام لكن معانيه واهدافه واضحه محد قدر يرد ...
قالت ريووف تبي تطلع لان الجو العام يوتر :-جود قومي نطلع الجو روعه
ماصدقت جود خبر طلعت مع بنت عمها القريبه منها مره ...
قالت ريوف :-ياربي الله يعين امي على مقابل هالنحسه نجوى
جود :-الله يعين الي يستحق العون جد
تقصد ماجد كلامها واضح!
قالت ريووف :-خلاص جود انسي
التفتت يمها جود وقالت باستهزاء :-انسى !! انسى!! هو القلب يقدر ينسى نبضه ووريده
سكتت ريوف لا حياة لمن تنادي ؟
شوي الا ولد اماني توه بثاني ابتدائي جاي لجود قال لها :-خاله جود
التفتت جود وقالت بحنيه :-هلا قلبي
مد عليها شي ملفوف بقصدير وقال :-خذي
عقدت جود حواجبها :-وشو ذا
قال ماجد الصغير وهو يناظر في خالته ريوف :-سر
ريووف :-هههههههه سر علي يا قليل الخاتمه
قال لجود :-عطيني اذنك
عطته جود اذنها وقال :-هذي من خالي ماجد يقول انتي بردانه وما افطرتي كليها انا الي مسويها
ماتت الابتسامه عن وجهها وراح ماجد يلعب انتبهت ريوف لوجهها الي متغير وقالت :-وشو ذا؟؟
قالت جود تحاول تخلي الوضع ايزي :-لحم صيد مشوي
ريووف :-يا قلبي يا مجود والله ويعرف يعطي لحم
ارتبكت جود :-من قال انها من ماجد هبلا انتي
ناظرتها ريووف وقالت :-هيه اقصدك ماجد ولد اختي اماني وين راح فكرك ...(شوي الا تستوعب) ... جودوه من ماجد اخوي ذي
قالت جود :-هههههههههههه اقول اص لا يسمعنك ذا السعالوه ترى مو ناقصه مشاكل
ريووف :-ههههههههه على قولتك
كلت جود من الشوي وهي كل ماتبلع قطعه تبلع معها غصه ...
قالت جود :-ريووف انا حاسه فيه شي منغص عليك عيشتك وش فيه
قالت ريوف وهي تضم يدينها لصدرها :-يختي عمه خالد بس ترمي حكي علي تخيلي تجرات وقالت لزوجي وانا جالسه انت طب وتخير الي تبي من بناتي وانا مستعده ازوجها لك
انصدمت جود :-وشو ؟؟؟
ريووف :-والله العظيم وقحه مررررررررررررره وبناتها اوقح
غمضت جود عيونها وقالت :-وكلي امرك لله والزم ماعليك رجلك قولي من جد هو يحبك
ريووف برقه :-الا يموت فيني زي ما اموت فيه
جود :-اجل ماعليك من الناس ولا من عمته المريضه ذي
قالت ريووف بكآبه ويأس :-كثر الدق يفك اللحام يا جود
عصبت جود :-الحمد لله لا تخلين هالمهبوله تأثر عليك لا تخلينها تزرع الشك بينك وبين رجلك
ريووف :-إيه وأنتي الصادقه ..
ورجعن للمخيم ...
،
،
،
،
،
@@@@> بمخيم الرجال
قال ماجد لابو طارق :-والله يبو طارق بغيت زواجي من نجوى يكون بالصيفيه شرايك
ابو طارق بابتسامه :-الي يريحك يا ولد العم لو تبي تاخذها الحين ماني برادك
ابتسم ماجد وقال :- مو بنت متعب بن صالح الي تتزوج بدون عرس
ابتسم ابو طارق وقال :-الي تشوفه سوه
ماجد :-الله يقدم الي فيه الخير ...
،
،
@@@@في نفس الوقت
قال مشاري لبندر :-الحين انت بتسوي الغداء
بندر بغرور :-ايه انا
مشاري (يستهبل) :-عز الله ما تغدينا
بندر :-اقول اسكت لا تجلس بدون غداء اعرفك يالنسيب
مشاري (بلهجه مأساويه) :-الله لايبارك في عدوكم مالقيتم تطلعون الا قبل عرسي باسبوعين
بندر (يستهبل) :-ليه خايف على بشرتك يالمزيون
مشاري :-هههههههههههههه ايه عندك مانع
بندر :-اقول قم قطع البصل ابرك لك
مشاري :-بصل عاد
بندر :-مشاريوه تقطعه ولا شلون
مقالب بندر في مشاري المسكين كثيره
قال مشاري :-لا لا اقطع امها اذا بغيت
بندر :-مابيك تقطع امها قطع الي بالصحن
مشاري :-هههههههههه اشوف فيك يوم
بندر :-هههههههههههههههههه
،
،
،

×وقت الغداء×
طبعا شباب العيله متكفلين بالطبخ وكل شي ..دق بندر على جود يعلمها ان الغداء جهز وبيجيبونه بعد شوي...
سمعت جود اصوات اخوانها وطلعت لهم تنتظرهم عشان تساعدهم
قالت لعمر وبندر :-ياهلا بالحامل والمحمول
عمر :-ههههههه الي يسمعها يقول مشفوحه
جود :-هلا والله بالسيد عمر مشاكل بالله اشرح لي شعورك يوم ابوي شاف خشتك
بندر :-ههههههههههههه ايه اشرح لها بالله ، والله وناسه
عمر وهو مكشر :-ماللطيبين نصيب بذا الدنيا
بندر وجود :-هههههههههههههههههههه
عمر :-ايه اضحكوا شعليكم انا الي تشرشحت موب انتم
جود :-ههههههههههههه تستاهل ابرك فتح عيونك بعدين لاجيت تسوق
عمر :-هذا جزا الي طاير عشان ماياخركم
جود (تستهبل) :-بالله عليك لا تفكر بمشاعرنا مره ثانيه
بندر :-هههههههههههههههه حلوووووووه
عمر :-ما اقول الا مالت عليكم ..هين يا جويده وانا جايب معي علبة جلكسي
طلعت عيون جود قدام :-هاااااااا وشو ..؟؟ انت اخوي حبيبي
عمر :-ههههههههههههههه يا شين المصالح
بندر :-هههههههههههههه يالله مشينا الرياجيل يحترونا بالغداء
جود :-عموري جبلي الجالكسي قبل لا تتغدا تعرفني مو راعية غداء
عمر (يغني) :- افكر وابقى ارد عليك
ومشى وبندر معه يضحك عليه يوم يغني مصري ..
نادى جود من بعيد :-استني دقايق بجيبه لك ماتهونين علي
ارسلت له بوسه :-يعيشون الاخوان الي كذا يعيشون
عمر وبندر :-هههههههههههههههه انهبلت هالبنت
ومشوا راح بندر للرياجيل وعمر راح لسيارته يجيب علب الجالكسي الي شاريها ..
قال ماجد لبندر :-فيه ببسي وحليب ولبن بترامس الثلج وديت للحريم شي
قال بندر :-يووووووو نسيت
جا بيوقف وجلسه ماجد :-انا بوديها
فارس :-اجلس انا اوديها
ماجد :-لا انا رايح رايح لاني مبقي لجدتي من الشوي ماودي تاكل رز مسلوق بس على الغداء
جلس فارس :-براحتك
وقف ماجد واخذ الاغراض وراح لمخيم الحريم ..
وقف وجمد مكانه كانت جود جالسه على السياره من قدام وتغني ..ورجلينها رايحه جايه كانت روعه ناعمه والاهم انها حبيبته ...
حبيبته ...؟
سنين مرت ولا قدر ينساها يوم اغترت عليه ورد لها الحركه بتهور ..وفي النهايه خسرها للابد ..
ياحبيبي اقرب ليه..بظمك بايدي
انت بتعرف انا شو بحبك..ومنتش غالي علي
ياحبيبي خلك حدي ..غير عيونك مابدي
بخاف لوحدي ابقى لوحدي..لو بتغيب شوي
صوتها يجنن ناعم حلو ..والاهم ان التوتر والخوف والحزن الي كانت مرتسمه على وجهها اليوم اختفت ..
قالت له (خذ يا ولد عمي حسافتي عليك تزيد يوم بعد يوم )
هي فعلا متحسفه ولا كلام ...
رديتيني يوم جيتك كلي امل يا بنت عمي ..عرفتي حبي لك ..الي نظمته لك عقود في قصيدي ..عرفتي انك اليوم والامس والحاضر والمستقبل ..وكسرتيني
ياما تمنيت اشوفك كسيره ..واليوم شفتك كذا ..شفت الحزن الي حفر في روحك قبور ..ولكن ماحسيت بالرضى ليه ليه ..؟؟
كلها الام خفيه في قلب عاشق لك ..رجال من صلب رياجيل قوي العود كلمته نافذه والكل يحسب له الف حساب ..ولكنه في النهايه اسيرك ..وانتي هاجسه ..
ناظرت جود في ساعتها "طيب يا عمر جحدتني بس هين مردوده"
وقامت ودخلت خيمة الحريم ..انتبه ماجد لعمره وانه واقف مايتحرك ..نزل الاغراض عند باب الخيمه ونادى البتول تجي تاخذها وقال تعطي جدته الصحن المقصدر ..
وقفت نجوى بعجله يوم طلعت لقته معطيها ظهره يمشي بغت تموت من الاحباط ...اخذت الاغراض ودخلتها وعيون الشك على جود الي اول مادخلت نادى ماجد من برى ياترى هل هي صدفه ولا كانت برى وهو بعد كان موجود ..؟؟
انقلب لون وجهها من الخوف والله ان قالت هالكلام ولا طلعته ليذبحونها ..
تغدوا البنات .. الا جود الي كانت جالسه تقرا لها كتاب ..
قالت ام طارق بخبث :-الا على طاري الكتب هاه مالقيتي وظيفه
ناظرت فيها جود بغرور :-الوظيفه لو بغيتها كان من بكره توظفت لكني مابي اتوظف
ام طارق بذهول كاذب :-يو وهالمصاريف والتكاليف تروح كذا
جود بدلع :-ليه احد شكا لك ..؟؟
قالت نجوى بغرور :-اذا تبغين واسطه عطيني خبر
ناظرتها جود وضحكت ضحكه بدون نفس :-ليه انتي الي بتتوسطين لي
قالت نجوى بقهر وعيونها مركزه تدور نقطة ضعف تلوح في وجه جود ولا شي :-لا بس ماجد واسطته نافذه
مسك جود اعصابها وقالت بغرور وبرود :-ان احتجت لواسطة ولد عمي طلبتها منه هو مادورت وسيط بيني وبينه
قلب لون وجه نجوى احمر بلون الدم ...بتموت الاكيد انها بتموت بسبب عمتها ذي ، عمتها الي هي عدوه لها ..
جت نجوى بترد وقالت اماني بقوه :-نجوى خلاص خير ان شاء الله كلامك كله ماله داعي
انفجرت نجوى :-الحين كلامي ماله داعي لا تنسين اني زوجة اخوك
اماني ببرود ورزانه :-ماهي معلومه جديده انك زوجة اخوي لكن عن الدق الي ماله داعي جود ما جت صوبك ولا غلطت عليك
جت بترد وقالت الجده :-خلاص بس ولا اسمع حس ماللكبير عنكم احترام لعنبو ابليسكم انتم لحم ودم ..
تفشلت نجوى وسكتت ...وناظرت ندى في جود الشامته "اه يا قوتك يا اختي كيف تتعمدين البرود وانا الي اعرفك واعرف ان الي بداخلك بركان قتال "
كملت جود تقرا كتابها وهي ما تشوف ولا حرف من القهر والدموع الي تحاول ترجعها ومافيه فايده ..
،
،
مرت فترة العصر بهدوء الي نام والي يتمشى والي يسوي الي يبي ...
طلعت جود برى ونادت ماجد الصغير ...
ماجد الصغير :-نعم يا خاله
جود بحنيه :-يا قلب خاله اسمع يا قلبي روح لخالك عمر وقل له خاله جود تقول تعال شب لنا النار قبل لا تغيب الشمس
ماجد الصغير :-طيب
وراح يركض ...
مالقى عمر وقال لخاله ماجد :-خالي
التفت يمه ماجد وهو يزيد نارهم حطب ويزينها :-بغيت شي مجود
ماجد الصغير :-خالي وين خالو عمر
ماجد وقف يدوره وشافه نايم في ظل سيارته :-شفه هناك نايم
وراح له ماجد الصغير وجلس يكلمه :-خالي عمر خالي قم قم خاله جود تبيك تشب لها النار
سمع اسم جود من جهه وترك البيده من جهه ..
نادى :-مجود تعال
جاه ماجد الصغير :- نعم
ماجد :-وش تبي من عمر
ماجد الصغير :-خاله جود تبي خالي عمر يشب النار
ابتسم ماجد :-طيب يالله مشينا انا بشبها لكم عمر نايم
واخذ معه حطب وساعده ماجد الصغير بعد ازعاج ...
دخلت جود الخيمه ولبست شابو ابيض على راسها عشان يدفيها وطلعت ..لبسها كان دافي بلوزه بيضاء صوف طويله للخصر وبنطلون ابيض من الجينز الثقيل كانت اكمام البلوزه طويله ومن جهه نازله عن كتفها طالع شكلها ناعم مره
وقفت تناظر جهة وجه رجال جالس يزين الجزه ورابط شماغه بقوه
"آآآآآآآه من الحمدانيه وراعيها "
تمسكت بطرف بابا الخيمه وهي تناظر بعيون غايمه ..لهفه ..وشوق وحنين ..وندم
رفع ماجد الصغير راسه وشافها قال ببراءه :-خاله جود النار جمرت يالله تعالي ...
جمد ماجد في مكانه ...كأنه حس بنظرات من وراه لكنه تعمد اللامبالاة ..والحين يحس بالبرود يسري في عروقه ...
طلعت عيون جود قدام ودخلت الخيمه فجاه ...
طلعت لها نجوى وقالت :-شفيك كنك متروعه
ماردت جود عليها ودخلت داخل وطلعت من الباب الخلفي ..عقدت نجوى حواجبها ملامح جود غريبه ..
طلت مع الباب وشافت ماجد شايل ماجد الصغير ويضحكون ...شبت نار الغيره بقلب نجوى
سحبت نفس وجلست تردد في نفسها ان الزواج مو من اول اهتماماتها ومن هالعبارات الي آمنت فيها طول عمرها

الفصل الثالث..
الجزء الاول..
دخلت نجوى الخيمه وغيرة العالم بقلبها قالت لجود وهي ترفع اصبعها علامه تهديد في وجهها :-ابعدي عن رجلي يا عمه (قالتها باستهزاء)
حقرتها جود ماتبي المشاكل بينهم تكبر ..والحقران يقطع المصران
قالت نجوى وهي ترتجف :-لاتحقريني وتناظريني بغرور على ايش انتي مغتره على الاقل ماجد لي فاهمه لي حلالي يعني ما من خوف منك ابدا ههههههههه
وبكل لغات العالم جود انقهرت منها قهر ماله مثيل ونوت ترد لها الحركه حتى ولو ماكانت تقصد وقالت بملامح هاديه وحاجب مرفوع وصوت هامس :-متاكده ان ما مني خوف يا بنت اخوي
طلعت عيون نجوى قدام من الفجيعه والله وطلعت جود موب سهله قالت بخوف :-تهدديني
همست جود بثقه :-لا تخليني احطك براسي ترى مو من صالحك
قالت بثقه تتدعيها وهي ابعد شي عنها في هالوقت :-ما تقدري ؟
قالت جود وهي تمر من جنبها :-جربيني
وقفت نجوى وهي ميته غيض قهر ...تناظر في جود الي طلعت تمشي من عندها ..
دخلن خواتها الخيمه وشافن وجهها مولع وعيونها متحجره من التعصيب
ناظرن بعض وقالت اسماء بطفاقه :-نجيو شفيك كن ميت لك احد
عايشه تهزئها :-يا ثقل دمك فيه وحده تكلم اختها كذا
اسماء ببلاهه :-انطمي خلينا نشوف علامها معصبه
وقفت نجوى تعض اظافيرها قهر :-جودوه ذي تبي تموتني ناقصه عمر
قالت عايشه :-ليه وش صاير ؟
نجوى وهي تعض على اسنانها لا تصارخ :-تهددني انها تبي تاخذ ماجد مني
صرخت اسماء :-سايبه هي ..
نجوى بقهر :-مدري مدري بموت من الخوف
عايشه :-هه والله انك غبيه لاتعطينها اكبر من حجمها ماتقدر تسوي شي انتي عارفه تفكير عيال العيله مستحيل ماجد يطلقك لو ايش انتي ناسيه ان ابوي ولد عمه وناسيه جدي ياماما انتي *****ه على ظهر قوي
ناظرتها نجوى بلهفه وقالت :-تهقين
عايشه بثقه :- الا اهقى ونص
كن نجوى ارتاحت شوي من كلام خواتها ...
*
*
*
قالت اماني للبنات :-بنات شرايكم نسوي لنا جلسه برى بدل القعده بوسط الخيمه
البتول بلهفه :-أي والله تكفين حنا نبي نطلع نشم هوى مو ننحكر بالخيمه
قالت نجوى بدلع :-معكم حق وناسه
وطلعن برى وتجمعن حول الجزه وراح الوقت في السوالف وسعه الصدر توقعت جود ان جمعتهن نكد بس عدت على خير وكانت حلوه وممتعه ..
قال نجوى وهي توقف :-انا استاذن بروح انام
ووقفن خواتها معها ..وراحن
قالت جود من قلب :-اوف فكه
ندى :-ههههههههه الي يسمعك يقولون جالسات على قلبكـ
البنات:-ههههههههههههههه
جود :-أي والله كنهن جالسات على قلبي ..
قالت اريام :-شرايكم نلعب لعبة الصراحه
تحمسن البنات ونظراتهن على جود بالذات فهمت جود نيتهن وقالت بدلع :-الحين انتم ماعندكم الا انا
ريووف وهي تغمز لها :-ماحد في حياته اكشن زيك
جود بخبث :-عندكم الانسه ندى حياتها اكشنات حاليا (تقصد موقفها مع ماجد)
حمر وجه ندى :-جووووووووودوه
جود وهي تحط يدينها على خصرها :-لا والله يعني اكلها انا لحالي
البتول :-هههههههههه هذي اولتها وش عندكم كل وحده خايفه من الثانيه
اريام :-ههههههههههه أي والله شعندكم كل وحده خايفه من الثانيه
حمر وجه جود ووجه ندى وجلسوا البنات يضحكون عليهم
اماني :-يالله بسم الله نبدء
وفرت علبه المويه وطاحت على ندى والي يسألها جود
جلست جود تحرك حواجبها يعني ناويتك ناويتك ...وندى تتميلح عندها :-جود قلبي اذا لسى تبغين العطر الي شريته ذيك المره مايغلى عليك
جود :-ها ها ها فاتت ياا قلبي ماعاد ابيه عقب ماكرشتيني انا انسانه عندي كرامه
ريووف بهمس :-ياشين المهايط
جود :-تلايطي انتي دورك جاي
اماني :-ههههههههههههههههههه خير وش ذا الاسلوب حشا جالسه بوسط عيال مو بنات
جود :-ههههههههههه تكلمت الرقيقه اقول اها بس (وناظرت في ندى وابتسمت بخباثه) والان يا مدام ندى علمينا بموقف محرج معك صار اليوم ..
حمر وجه ندى وجلست اريام تضحك لانها فهمت قصد جود ..قالت ندى وهي تتوعد :-هين يا جويده مردي منتقمه منك
تحمست البتول وقالت :-يووووووه يالله علمينا اكيد صاير شي جود ونعرفها
ريووف :-هههههههههههههه اكيد اقطع يدي ان ماكان صاير شي
اماني :-يالله ولا حس ندى جاوبي على سؤال جود
اضطرت ندى تعلمهم عن موقفها المحرج الي صار مع ماجد اليوم .. وجلسوا البنات يضحكون بشكل هستيري خصوصآ ان جود واريام يعلقون عليها ...
اماني وهي متقطعه ضحك :- ههههههههههههه يالله فشيله بحق
ندى وهي مكشره :-حرام عليكم تعذبوني تراي ما تخطيت فشلتي للحين ..
البنات :-هههههههههههههههههههههههه
ودارت العلبه مره ثانيه وطاحت على جود والي تسالها ندى .. انقلب لون وجه جود واستانست ندى ..
قالت اريااااام :-الليله السهره تهبل
جود :-ايه شعليك اننتي فالتها ...
قالت ندى الي ماقدرت تتحمل تضيع وقت :-والان يا انسه جود علمينا ليش رفضتي تتزوجين حامد مدري شسمه هذاك الي خطبك
ارتاحت جود صحيح ان اختها عليها حركات نذاله بس مستحيل تعلم بالموقف الي صار لها مع ماجد اليوم قالت جود بدون نفس:-كذا مو معجبني
البتول :-لا ياشيخه دوري غيرها
رمتها جود بشالها ..
اماني :-ههههههه يالله علمينا هذا واحد من كذا واحد رفضتيه
جود بضيق :-كلهم اربعه لا تكبرين السالفه
ندى وهي مبققه عيونها :-هه مستقله اربعه ترى ما خطبني احد قبل مشاري بعد قلبي
جود :-هههههههههه احمدي ربك طيب بعدين انتي متملكه من زمان يعني لو ما ملكتي كان الخطاب طوابير
ناظرتها ندى بنص عين وقالت وهي تغمز :-للاسف ماراح تقدرين تنسيني السؤال
تاففت جود وقالت وهي تدفي يدينها على الجمر :-لاني مابي اتزوج ارتحتوا
هجدوا البنات فجاه وعم السكون ..ممكن تكون صدمه ممكن تكون مفاجاه الجمتهم ..
قالت اريام :-تتكلمين جد
سكتت جود
كررت اريام السؤال :-جد
جود بعناد لكن بهدوء :-ايه صدق
قالت البتول بفجيعه :-ليه
طبعا البتول ماعندها خبر عن قصه ماجد وجود تعرف عن الشي الي جمعهم بس ماتدري وش الي يعتمل بالقلوب للحين
جود وخدودها حمر :-كذا
وناظرت في الساعه ووقفت ..:-يالله الساعه ثلاث الفجر تصبحون على خير
وبعدها قامن البنات عشان ينامن ...

(الله اكبر ، الله اكبر ،اشهد ان لا اله الا الله اشهد ان لا اله الا الله ، اشهد ان محمد رسول الله اشهد ان محمد رسول الله ،حيا على الصلاه حيا على الصلاة ، الله اكبر الله اكبر اشهد ان لا اله الا الله)
قامت ام صالح من النوم على صوت ماجد وهو ياذن بهم لصلاه الفجر ..وصحوا البنات عشان يتوضون و يصلون ..
وبعد الصلاه رجعوا ناموا ..
طبعا ابو متعب ومتعب ماناموا عقب صلاه الفجر لانهم نايمين بدري ..اما الشباب فبعد الصلاه رجعوا ناموا على اساس يصحون الضحى ..
وقبل لاينام ماجد شب النار وزين القهوه ورجع نام
<<الساعه 7 ونص الصبح @@@@
صحيح ان الشباب كانوا سهرانين لكنهم صحوا واحد ورى الثاني الجو حلو وريحه المطر
تخلي الواحد ما ينام كثير ولا قام يقوم نشيط ومنتعش ..
قامت جود قبل البنات وغيرت ملابسها ودورت امها لقتها تزين الحطب عشان تشب النار
حبت راس امها وقالت :-يسعد لي صباح احلى ام
امها :-هلا حبيبتي غريبه صاحيه
قالت جود وهي تمد يدينها في الجو وتتحسس قطرات المطر :-فيه احد يجيه نوم في هالجو الي يرد الروح
امها :-أي والله
ناظرت جود لقت امها مجهزه دقيق بر بتعجن وتخبز على الجمر طلعت عيونها قدام من الوناسه مافيه زي خبز الجمر ..
قالت جود ببزاره وهي ضامه يدينها وكانها طفله :-يمه تكفيـن تكفيـن بعجن انا
ناظرتها امها بابتسامه جعدت وجهها :-من يوم منتي صغيره وانتي تحبين الحوسه والتخبيص تعالي بس ارفعي اطراف بلوزتك قبل ..
جلست جود وتربعت متحمسه وامها تناظرها بحنان وحب والغصه بحلقها تخنقها *تحسبيني يمه مدري عن الي بقلبك والي تحسين فيه *
رفعت جود اكمامها وجلست تخبص في ذا الدقيق والمويه وامها تعلمها وتنبهها ..
جت ام صالح من برى لانها حبت تطلق رجلينها شوي ودارت حول الخيمه ورجعت
قالت بابتسامه مجعده وجهها الحنون :-بنيتي جود تسوي الفطور لنا
الا ام طارق تقول :-عز الله ما افطرنا اجل
رفعت جود حاجب وقالت ترد على جدتها :-ابشري بالخير ياجده
قالت ام صالح وهي تخز ام طارق :-يكفي بس تلمسه جود عشان تزيد حلاوته
الا وام ماجد تقول وراها :-أي والله صدقتي ياعمه جود تحلي الشي لا لمسته
انطمت ام طارق ..وماردت ام بندر لانه ما تنزل نفسها للمستوى ذا من التردي ..
خلصت جود ووقفت قالت :-يالله يا احلى ام خلصت مهمتي
وابتسمت احلى ابتسامه ...
قالت امها :-طيب يمه لاغسلتي يدينك تعالي ودفيها على الجزه لا تموتين برد
جود :-ابشري يا قلبي
وطلعت تغسل
قالت ام طارق منتقده وهي تصب لها فنجال قهوه :-البنت ما تنتدلع يا ام بندر
ناظرتها ام بندر بنص عين وقالت :- هذي جود حبيبتي واصغر بناتي
قالت ام طارق وهي مصره تخرب صباح ام بندر :-عارفه بس شوفي الي بعمرها متزوجات وهي تتدلع وكل خطيب ترده عمر الي يروح مايرجع
مسكت ام بندر اعصابها لانها عرفت المعاني بكلام ام طارق بس ماتبي تنفعل وتحقق لها مناها وقالت :-هذا جود بنت صالح وما راح تتزوج الا رجال من مستواها
قالت ام ماجد وهي تناظر ام طارق بعدم رضاء وتاييد :-صدقتي يا ام بندر مو أي واحد يصلح لجود جود يصلح لها رجال مركز وهيبه وشخصيه
قالت ام طارق بضحكه حاده ترفع الضغط وهي ميته قهر من رد ام ماجد :-هالكلام ماراح ينفعها لا عنست بنتها
قالت ام بندر ببرود :-واذا فرضنا انها ما تزوجت بتنتهي حياتها ولا بتقل محبتنا لها ..
قالت ام طارق غصب:- لا ما تنتهي
ام بندر :-اجل فضيها سيره
قالتها ام بندر باسلوبها القاطع وطبعا ام طارق ضعيفه الشخصيه سكتت ..
ابتسمت ام ماجد من قوة ام بندر وقالت في نفسها ماجابت جود القوه من احد غير امها !
طبعا ام صالح كانت متفرجه للي صار وهي تقول في نفسها (بو طبيع ما يجوز عن طبعه )
دخلت جود الخيمه ووجهها احمر من البرد دفت يدينها وجلست تفطر مع جدتها وام طارق وامها وام ماجد وطبعا نظرات ام طارق تخزها من وقت للثاني ..
طنشت جود نظرات ام طارق الاستفزازيه وجلست تسولف مع جدتها وامها ومرة عمها وتضحك وشوي الا البنات صاحيات من النوم وكبرت الجلسه .

الجزء الثاني
قالت عايشه لاسماء :-اه يا قلبي شفتي فارس
اسماء وهي تعقد حواجبها :- متى ؟؟
عصبت عايشه :-يا البقره الي توه جايب لنا ابريق الحليب
قالت اسماء :-ااااااايه شفته
عايشه وهي متحمسه :-شرايك
اسماء :-ماركزت مالت عليك ..وبعدين انا كنت مخططه عليه بس يالله حلال عليك
دفتها عايشه بدفاشه :-طسي هناك الي يسمعك يقول خطبني وقضينا
اسماء :-هههههههه ماعليك خلي نجوى تاخذ اخوه وتتمكن منه وعقبها اضمنيه
لمعت عيون عايشه :-تهقينه
اسماء :-اجل
عايشه من قلب :-من بؤك لباب السما قلبي ارتقص يوم شافه
اسماء :-هههههههههههههههه الحمد لله والشكر بس
عايشه :-هبلا يوم تتحمدين علي
طارت عيون اسماء وسحبت عايشه معها وعايشه تصارخ شفيك حطت اسماء يدها على فم اختها لان صوتها مرتفع مره ومزعج ..
قالت اسماء لعايشه وهم ورى وحده من السيارات الي بينهم وبين خيام الرجال :- شوفي خالد زوج ريوف ما اقول الا مالت (وكشت على وجهها ووجه اختها)
ناظرت عايشه فيه بوله :-ماشاء الله يجنننننننن يهبببببببببل طوووووووويل
شوي الا وريووف تتنحنح وراهن جمد الدم في عروقهن ..
قالت ريووف وهي تحاول تسيطر على اعصابها :-وش هالجمعه الحلوه
طلعت عيون اسماء قدام وقالت بوجه مشحب :-ولاشي يالله يا عايشه
وركض راحن للخيمه
وقفت ريووف تناظرهن وتتحمد ربها على نعمه العقل ..
عدلت لبسها ووقفت تنتظر زوجها يجي وقفت ريووف والبسمه تنور وجهها في هالصباح الندي ..
قال خالد وهو يقرب :-يا صباح الورد يا صباح النور والزين والحب ياصباح الخير ياروحي
حمرت خدود ريووف ولا كنهم متزوجين لهم قرابه السنتين ..
ريووف وعيونها تعكس شعورها :-صباحك ورد يا قلبي نمت زين
غمز لها خالد :-الحين ذا سؤال تسألينه
حمر وجهها مره ..:- تفكيرك دايم غلط
قال ببراءه :-حرام عليك انا تفكيري غلط
ريوف :-هههههه لا الي واقف وراك هو الي تفكيره غلط
وبسرعه رفعها عن الارض وقال :-اسحبي كلامك
جلست ريوف تصارخ وتقول :-خالد بلا فضايح نزلني
قال بعناد :-جاك العلم اسحبيه اول
ريوف بعناد :-منيب ساحبته
خاالد جلس يصارخ :-عمه عمه ام ماجد
طلعت عيون ريوف قدام :-خالد وجع شتسوي
خالد وهو يناظرها بنص عين :-تسحبينه ولا شلون
ريووف :-طيب طيب سحبته حقك علي يا استاذ خالد
نزلها على الارض والابتسامه من الاذن للاذن ..
قال خالد لها يوم شافها مسويه نفسها معصبه :-شرايك نتمشى على السياره شويه
ريووف (تتغلى) :- مابي
خالد وهو يهمس بإذنها :-واذا قلت انك انتي الي بتسوقين بنا
طارت عيونها قدام ونست الزعل جلست تناقز مثل طفله :-جد
خالد :-ههههههههههه ايه يالله مشينا
مسكها مع يدها وقالت :-عبايتي هناك
خالد :-خليها ما حنا بمبعدين وبعدين معك ذا الشال الي وش كبره
ريووف :-هههههههه اول مره اركب سياره بدون عبايه بس يالله نوبروبلمز
وراحوا لسيارة خالد ...
*
*
*
*
*
@@@@@@@@ في الخيمه ..
قالت عايشه لاسماء :-الله ياخذك يا اسماء اخاف تسوي ريوف لنا مشكله
اسماء :-ليه ما سوينا شي
عايشه :-نقز رجلها وتقولين ما سوينا شي
اسماء :-محد قال له يترزز قدامنا
طلعت عيون عايشه قدام :-مجنونه انتي رجلها مادرى عنا حتى ..
اسماء وهي تكش عليها :-قومي طسي هبلا طول عمرك
عايشه :-اقول الشرهه على الي يتكلم معك فارقي هناك
اسماء :-فارقي انتي
الا امهم تقاطعهم :-خيــر بزران انتم اصواتكم ليش عاليه
البنات :-ولاشي
ام طارق :-اجل اص ولا كلمه اثقلن يا مال الي مانيب قايله
البنات :-طيب
ام طارق :-روحن ساعدن نجوى بدال ما انتن جالسات تتهاوشن
وراحن لاختهن وهن طفشانات ..
عايشه وهي تتحلطم :-شغل شغل اف اكره الشغل
اسماء :-ههههههه وامي شدراها خلينا نرتز مع نجوى ونسولف عليها كالعاده
عايشه :-هههههههههه جبتيها
وراحن لقن نجوى تسوي قهوه وشاهي ..
نجوى وهي تناظرهن :-وينكن فيه من اليوم
قالت اسماء بحماس وهي تجلس مقابل لاختها :-رحنا نقز الرياجيل وشفنا زوج ريووف
عقدت نجوى حواجبها :-من خالد ..؟
عايشه تتطنز:-ايه خالد ليه هي متزوج غيره
اسماء :-هههههههههه كفك
نجوى :-يا ثقل دمك انتي وياها وليش تقزونه لو شايفتكم ريوف قامت مشكله
اسماء :-لا تذكرينا
نجوى :-وشو
عايشه :-شافتنا وحنا نقزه من ورى وحده من السيارات الله يعيننا بس
نجوى وهي تهز راسها :-تستاهلن الي يصير لكن
عايشه :-امحق اخت
ناظرتها نجوى بقوه وجلست اسماء تضحك عليها ...
،
،
،
@@@@في نفس الوقت
راحت جود وندى للخيمه ..وجلسن مع الحريم الكبار
دخلت ام طارق الغرفه والبسمه شوي وتشق وجهها
قالت ام صالح :-خير علامك مبسوطه يا ام طارق فرحينا معك
قالت ام طارق وهي تناظر جود بشماته :-ماجد يبي يتزوج نجوى بالعطله هذي علمني تركي قبل شوي
مات شي بداخل جود وقالت تكلم نفسها (تماسكي يا جود ، تماسكي ) حست بيد اختها تمسك يدها الي على الارض بقوه ..وتدعمها حست بقوه خلتها تتماسك وملامح وجهها ماتغيرت بشي
قالت ام ماجد :-ايه عندنا خبر
ام طارق بعصبيه :-وليش ماقلتوا لي تراي ام العروس
ام ماجد :-السالفه ماصارت الا امس لا تكبرين المواضيع يا شيخه
ام طارق وهي تكلم ام صالح :-يرضيك الي يصير يا عمه
ام صالح :- ما صار الا الخير لا تكبرين السالفه
مسكت جود نفسها لا تضحك على شكل ام طارق الي انصدمت صدمتين صدمة انهم سحبوا عامل المفاجاه منها وثانيا ان جود كانت عاديه وعفويه ولا ماتغيرت ملامحها ولا انفعلت وسوت مشكله
قالت ندى وهي تكح عشان تضحك :-جود وجع لا تضحكين
لكن جودكانت تضحك ومحد منتبه لها سحبتها ندى وطلعن برى وهن فاطسات ضحك من شكل ام طارق
قالت ندى بعد ماراحت نوبة الضحك :-غريبه توقعت ردة فعلك غير الضحك
تعمدت جود البرود وقالت بعفويه :-عادي تحصيل حاصل ذا
ناظرتها ندى بشك وهي مقرره ما تخلي اختها تغيب عن عينها دقيقه ..
وراحن يمشن بهالجو الحلو ولو انه يشمس شوي وفجاه تختفي حرارة الشمس ورى غيمه ويبرد الجو .
رمشت جود وهي تحمد ربها لان نظارتها مخفيه عيونها عن اختها ووجهها الاحمر ماراح تظنه دموع وحزن لا راح تحسبه تأثيرات الجو البارد ..
راح كلام ام طارق يتردد براسها زي الصدا ..ويحفر بذاكرتها وقلبها زي النار ..الي حتى لو راح الالم يبقى ذكره محفور ما يروح
ظمت يدينها ببعض وهي ماسكتها بقوه ياليت الالم النفسي بالم الجسد يروح ..ياليت الدمعه الي تنزل تطهر كل الوجع وتاخذ في دربها الآه ..لكن لا الم الجسد يخفف ولا دموع العين تشفي ..
كانت ندى تكلمها وهي ضايعه في عالمها تنحنحت وقالت :-وش كنتي تقولين ..
ندى :-لي ساعه اتكلم
جود :-ماعليه ما انتبهت
ندى وهي تتأفف :-ولا شي كنت اقول اخاف فستان الزواج ما يعدلونه زي ما ابي
جود :-ان شاء الله يضبطونه انتي غسلتي شراعهم وماقصرتي ..
ندى :-هههههههه يستاهلون ادفع الوف على الفاضي
جود :-ههههههههه مايضيع لك حق
ندى :-هههههههه طبعا
ناظرت جود في الساعه ,, سبحان الله كيف الوقت يركض وهم الظهر الحين ..
قالت جود :-سبحان الله الجو ينسي الواحد الوقت
ناظرت ندى في ساعتها :- اف اف تاخر الوقت وناظرت في جوالها باحباط
جود :- ههههههههههه للحين رافضه تكلمين فارس احلامك
ندى :-ايه طبعا ليش يكلمني وزواجنا بقي عليه كم اسبوع
جود :-حركاااات
ندى :-هههههههههههه اعجبك انا ، خليه يشتاق لي
جود :- هههههههه ومنكم نستفيد
شوي الا وماجد ولد اماني جاي يركض وامه واريام وراه ..
ضم جود وجلست جود تدور فيه وتضحك ..
ندى :-ياربي احمدك واشكرك على نعمة العقل
البنات :-ههههههههههههه
@@@@بعد يومين ..
ضاق صدر جود وموب قادره تتحمل هاليومين الي فاتوا و خواتها والبنات متناوبين عليها وما تركوها دقيقه طفشت ملت ..باليل لا جت تنام توصل الدمعه وبعنادها وعنفوانها تردها وتنهرها ,,
لا دموع لا يا جود لا ..إن بكيتي ما وقفتي ..كافحي ..قاومي ..كابري ..بس لا تنهاري ابدآ لا يطري عليك ذا الشي ..
ناظرت في ساعتها لقتها 6 ونص الصبح ..والبنات نايمات قدامهن نص ساعه على بال ما يقومن من النوم ..
وقفت ثم لبست ملابس دافيه وأخذت معها شال ثقيل تبي تمشي شوي تجلي أفكارها وتترك الحريه لدموعها ..لبست بنطلون جينز ازرق وبلوزه صوف هاي نك بيج وفوقها بالطو بني طويل للركبه ..لفت انتباهها الهوائيه حقت اخوها عمر اخذتها تبي تتسلى وتحط شارات وترميها
طلعت من الخيمه تمشي وهالمره هي مركزه على الطريق عشان ما تنسى درب الرجعه زي ذيك المره ..
راحت عن الخيم شوي يعني مو بعيد مره بس تقدر تشوف المخيم ..
حطت لها علب وجلست ترمي ..

شده صوت خفيف ولما ركز عرفه ذا صوت البندق الهوائيه ..السلاح المخصص للصيد الخفيف زي العصافير وقوته مو ذاك الزود ..
طق اللطمه وراح لمكان الصوت ..وقف في مكانه مصدوم هذي هي ولا يتخيل ...
غمض عيونه بالم وش هالصدف الي ماترحم.
سمع صوت شهقاتها وهي ترمي الطلقه ورى الثانيه واغلب رمياتها ما تصيب الشارات الي حاطتها ..
قال بهدوء :-اليوم ضايعه بعد ..
جمدت جود في مكانها وبردت عظامها وجلست ترجف ..وش ذا الحظ الطين يوم لقت فرصه تفضي فيها الي بقلبها وصدرها يطلع لها هو .. هو ماغيره ..لو البنات كان اهون بمية مره ..
ياشينها لا صرت بأصعب حالاتك واضعف أحاسيسك وفجاه تقابل سبة عذابك وحنينك
غمضت عيونها وهي تحط الشال على راسها وقالت بصوت يرتجف :-لا ما ضعت المخيم وراي مو بعيد
وقف جامد مو قادر يتحرك ماقدر يمنع نفسه وقال :-وش قصدك يوم قلتي ان حسافتك علي تزيد يوم عن يوم
تمنت جود تنشق الارض وتبلعها وش جالسه تسوي وهي واقفه معه كذا ..
قبل لا ترجع المخيم قالت له بهمس :-قصدي واضح يا ولد عمي انت الله يوفقك وانا يعوضني الله ..ورجعت ركض للخيام ودموعها زي السيل على وجهها ..
دنق بالارض ..ولمعه الدموع بعيونها مثل لمعة سيف انغرز بقلبه واجتثه ..
انتبهت لدمعها بالهدب والكحل سال


لين جفت عينها دمع والقاع ارتوى

وابتدت لحضة جفا وانتهت لحضة وصال


وأنطفى نور السعادة واحسب انه ضوى

ما اكتفيت من الهوى والغرام أربع ليال


واقفت أيام التلاقي وجا وقت النوى

كنت ابسلى وابتسم والتفت عنها شمال


لا قويت الصد عنها ولا قلبي قوى

ما هقيت ان الهوى عذب قلوب الرجال


لين ضاع القلب مني وتفكيري سوى

رحت أدور دفوة الشمس ضيعت الضلال


جيت اطفي شعلة النار والقلب انكوى

ماهقيت ان السعادة خيال في خيال


تروى قلوب الحبايب وقلبي ما روى

كنت ابشتال الهوى والهوى ثقل الجبال


وان تحملت الجبل ما تحملت الهوى

كنت ابسلى بالهوى والهوى صعب المنال


ما رضا لي حظي اللي طواني وانطوى

قلت لا فراحي تعالي ولا قالت تعال


والخفوق ان قلت ابقبل على صدي نوى

الله أكبر لا شرقت شمس يتلاها زوال


كيف ابفرح في صباح مع الليال استوى؟

لاحصل بالحب قسمة ولا جا لي مجال


غير اشوف معاند الجرح وعناد الدوى

شبت النيران واقفت وجاء رد السؤال


ما تشب النار يا كود يوصلها هوى ..

(للشاعر /حامد زيد)
*
*
ماتدرين يا غناتي عن الي بقلبي واني كنت مجبور ..صديتي عني وحطمتيني لكن سعادة مشاري كانت متعلقه فيني وسويت الي سويته وآه لو تعرفين شكثر انا ندمااااااان ..
كانت عيونه الي زي عيون الصقر تناظر في اتجاه واحد وماتشوف ..تنهد من قلب يا شينها لا صرت مظلوم وظلمت ..
رجع يكمل مشي وهو عاقد حواجبه والمزاج مقفل كالعاده لاصحى من النوم ..
سمع صوت ضحك ..يوم ناظر اخته ريووف تركض وخالد يلحقها ..وش ذا الحظ الي مطيحه في الصدف اليوم ؟
قال لهم :-ياربي لك الحمد والشكر انتم وش مصبحكم
حمر وجه ريوف وقال خالد :-يا شين العذال واحد ومرته انت ليش قاط وجهك
قالت ريووف وعيونها طالعه :-هيه لا تغلط على اخوي
ماجد :-ههههههههههههههه بعدي وخيتي
خالد قزها (وكشر كانه مسكين):-اجل خلي اخوك ينفعك وانا بروح لامي اصرف لي محد يحبني غيرها
ريووف برقه :-يا قلبي انا قلت كذا مصالح عشان ما يطردنا ماجد من المخيم
خالد :-ايه صدقتي ..
ومسكها يظمها طاح وجه ريووف وماجد جلس يضحك عليهم ورجع للمخيم ..
جاء لقى عمه وابو طارق جالسين وبندر معهم ..
ماجد :-السلام عليكم ..
"وعليكم السلام"
ابو متعب :-وينك يا ماجد من اليوم
ماجد وهو يجلس جنب عمه :-رحت اتمشى شوي
ابو متعب وهو يقلب عيونه في التراب الندي الي قدامه ...كانوا مسوين جلسه عند باب الخيمه الكبيره وشابين نار وجالسين حولها ..غمض ابو متعب عيونه يتنشق الهواء البارد العذب ..
شي يرد الروح ويجلي القلب من همومه ...
ناظر ابو متعب في جنب وجه اخوه الي كان مستمع للهرج الي يدور حوله بصمت وتركيز لطالما كان قليل حكي ولا حكى جت هرجته حاسمه قاطعه واضحه ..
قال ابو متعب :-قل لي يا ماجد تفاهمت مع ابو طارق على موعد عرسك
ماجد :-ايه يا عمي العرس ان شاء الله بيكون عقب عرس بندر والبتول
ابو متعب :-هههههه الله يوفقكم عيلتنا السنه ذي عروسها واجد مشاري وبندر وانت الله يوفقكم يا عيالي وترى تكاليف زواجاتكم كلكم علي
بندر :-جعلك سالم يبه ما قصرت انت ربيتنا وعلمتنا وجا الوقت الي نعتمد فيه على انفسنا
ماجد :-معه حق يا عمي حنا الي مفروض نعطيك
جا مشاري بيحكي وقال ابو متعب :-جاكم العلم انتم ترادوني
ماجد :-محشوم يا عمي ..
عمه :- اجل لا يكثر هرجكم
ماجد :-الي تشوفه يا عمي عساك ذخر لنا ...

(الفصل الرابع ..)<<<
كانت جود جالسه برى وتناظر في الفراغ ..ارض ممتده قدامها الى مالانهايه عشب ندي وهواء لا بارد ولاحار شي يحرك شعور اقسى البشر ..غمضت عيونها ورجعت فتحتها ترف على وجهها اجمل الرموش ..رجعت شعرها بيدها وهي تتنفس بإحباط ..
/بدا العد العكسي ومشوار الالم بيبدا /
لا دمعه ولا دمعتين ..ولا شي ممكن يغسل هالوجع الي يطحن قلبها طحن ..
بس لازم تتماسك مالها الا كذا ..اغتريتي يا جود بنت صالح اغتريتي عليه وقلتي انت موب عايش بدوني ,, اغتريتي وقلتي محبته لي ما فيها شكه ..نسيتي من هو نسيتي عزته ونسيتي انه طال الزمن او قصر رجال من ظهر رجال .. وعمر الحر ما حنى راسه في ذل ..
جمعت وجهها بين يدينها تنوح بصمت وهمس...
كنت بزر ..كنت صغيره
ما دريت ان الكلمه لا طلعت زي السيف ..
ما دريت ان كلمه لا طلعت تداوي ..وكلمه لا طلعت تذبح ..
وانا ذبحته يوم وهو ذبحني دوم ..
وقفت جود ومسحت دموعها ..تكبرتي يوم في وقت غلط الحين جا الوقت الي تكبرين فيه بحق ، احيانا الكبر مهرب ومخرج وحاجز بين الناس وبين الشي المكسور بصدرك ..
قربت من الخيمه بتدخل وسمعت نجوى تقول لريووف واماني عن خطط زواجها ..فستان ابيض نافش وذيل طويل ...
ما قدرت تستحمل اكثر وطلعت تركض باقصى ما عندها من قوه ..بعدت شوي عن الخيم ..وكالعاده لعبت الصدف دورها هنا لكن هالمره انعكست الادوار..
عقدت حواجبها شوي ومشت على مهل ..ناظرت زين وعرفته كان ماجد جالس ومعطيها ظهره غمضت عيونها .. الجنون قريب قريب ..
العطله ذي كلها عذاب في عذاب ..زواج اختها قريب ..زواج اخوها اقرب ..
والاهم
زواج الروح .. زواج النفس .. زواج الهنا .. زواج الغالي بعدهم كلهم
"الرحمه ياربي ، الرحمه ، انا بشر قلبي موب اقوى القلوب "
دق جواله ..ثلاث رنات وطلعه من جيبه ناظر في الرقم وتأفف ثم رجعه لجيبه
انتبهت جود انها واقفه كالعاده متسمره وزي ماجت مادرى رجعت مادرى ..
بقي قداهم اسبوع ويرجعون الرياض وهي على نار الايام دهور والساعات سنين ..
رجعت الخيمه لقت نجوى مندمجه في تجهيزات زواجها ..
قالت نجوى :-جود بغيت رايك .في شغله ..؟
قالت جود :-وش تحتاجين رايي فيه .؟
قال نجوى وهي مبتسمه ابتسامه نصر شماته تشفي الله اعلم :-ابد انا اقول للبنات ابي فستان ابيض وهم يقولون جيبي سكري احلى شرايك ..
طعنه بصميم القلب ..
قالت جود :-انتي ابخص ومقدر اعطيك رايي في شي ما شفته
قالت نجوى :-طيب لا رجعنا الرياض اذا كنتي فاضيه نطلع نتسوق سوى
انكمش قلب ندى .. وش تلف وتدور نجوى عليه من اليوم ..
وفجاه عرفت ..
لااااااااااا
نجوى تستفز جود تبي تطلعها من طورها .. لكن على مين موب جود الي تفقد اعصابها بسهوله ..
صارت لها مره وانهارت ..؟ لكن عقب مافيه اقسى واقوى من جود ..
رجعت ندى ثلاث سنوات ورى ..
كل شي صار وكأنه امس ... ما تدري للان من الجاني والمجني عليه لكن الي تعرفه ان جود ماهيب الاوليه ..وانها طلعت من المستشفى من هنا انسانه ثانيه ..
غابت اختها ..اختها المرحه المغروره احيانا ..الطيبه دايم والحنونه ..وجاء بدالها طيف يعيش ويحيا للغير ..
مسكت ندى نفسها لاتبكي وبلعت غصتها لا تطلع ..
انهارت جود اول ما وصلها خبر ملكة ماجد وما يعرف با السالفه ذي الا البنات ويزيد لانه اقربهم لخواته ..
كان الخبر مفاجاه لان الكل كان شبه متيقن ان جود هي عروس ماجد ...
بس ماكان صدمه الا للمقربين الي يعرفون بالشعور الي يجمعهم ..
حب عذري ..كبر مع الوقت ..
ونما وبناء اساساته واشتد ..
حبته من سيرته وحب اهلها له .. وحبها لانها بنت عمه بنت الاصل والفصل والتربيه ..
حبها لانها بنت صالح ..واخت بندر
وحبها لانها جود ..جود بس !
لما انهارت جود ماكان بالبيت احد الا ندى و يزيد واختهم الكبيره آمال ..اخذوها للمستشفى وقالو لهم ان الي جاها صدمه نفسيه شديده ..
تنهدت ندى ..صدمه نفسيه مره وحده ..شكل الي صار كان صدمه هدت كيان جود .ذبحتها من الوريد للوريد
طبعا الطبيب قال لهم انها تعرضت لصدمه قويه ادت الى انهياريها..تتذكر نجوى ذاك اليوم يوم ناظرت في امال وامال ناظرتها ..ويزيد ظل ساكت ما يدري شيقول كان وقتها صغير عمره 16 سنه تقريبا ..
قالت امال للطبيب :-لها زميله بالجامعه توفت
الطبيب بتفهم :-ايوه من شان هيك اجتها صدمه
قالت امال بغصه :-عسى مابها شر
الطبيب :-لا مافي الا كل خير بس لازم تظل تحت المراقبه كم يوم الي صار مو سهل هيدي صدمه نفسيه

آمال بالغصب :- طيب خير ان شاء الله
وطلعن من عند الدكتور ..
كان يزيد معصب :-وش بيقولون عنا الناس جتها صدمه بسبب ملكة ولد عمها
مسكته آمال على طرف وهزئته قالت بهمس :-يزيدوه اسكت ولا تجيب السيره على لسانك ابد انت سمعتني وش قلت للطبيب اعتمد هالكلام ولا تزيد ولا تنقص
يزيد بقهر :-طيب
ندى كانت طول الوقت ساكته وقلبها مع اختها ..
آمال لندى :-سمعتي شقلت ندى
ندى بغصه :-ايه سمعت
آمال وهي تحط يدها على جبهتها من كثر الضغط :-الله يعين لا تجلس حرمة اخونا تطلع كلام على جود
ندى بعصبيه :-تخسي والله ليطلقها اخوي انا جابت سيره جود بالباطل
آمال بثقه :-ما علينا منها شيخه واعرفها بتنطم موب قايله شي (خنقتها الغصه) انتي متخيله الي صار لاختك
ندى والدموع متجمعه في عيونها :-اه يا امال وش بنسوي الي صار ماراح ينتهي على انهيارها وبس الي صار للابد ماجد تزوج نجوى ..يا ويل قلبي مالقى يتزوح الا نجوى ، (قالتها بدون تصديق) نجووى .
امال والقهر مضطرمه نيرانه بصدرها :-عز الله طاح وما حدسما عليه ..وهو اختار ويتحمل نتيجة اختياره
ندى وهي تمسح دموعها :-ليش يسوي كذا في جود ليه ..؟
قالت امال وعيونها تناظر ورى ندى :-اص ابوي ووامي وصلوا ..
ابو متعب والهم مالي وجهه :-آمال اختك شفيها وش صاير
ام بندر بكرب :-يمه اختك شفيها شصاير طلعنا من عندكم مابكم الا الخير وش الي صار
آمال في نفسها (اه لو تدرون بس)
آمال بهدوء :-والله يمه وحده من زميلاتها بالكليه صار لها حادث وماتت
امها :-لا اله الا الله ، انا لله وانا له لراجعون
ابو متعب :-لاحول ولاقوة الا بالله
آمال :-واغمى عليها جبناها هنا
ام بندر وهي مدمعه :-بنتي وين ابي اشوفها
امال :-هناك يمه بس هي نايمه الحين معطينها مهدئات
ام بندر وهي تمسح دموعها :-يا ويلي عن بنيتي مهدئات بعد
ابو متعب :-اذكري الله يا حصه والبنت مابها الا العافيه
ام بندر :-ونعم بالله ..
وراحوا لغرفتها كانت نايمه وبيدها حاطين مغذي ..
جلست امها جنبها ومافارقتها دقيقه ...
غمض ندى عيونها من هالذكريات الشينه ..ذكريات انطواء جود والشهور الصعبه الي عاشوها معها لين طلعت من وحدتها ظاهريا طبعا ..لان الي ينكسر ما يتصلح وان تصلح تبقى به ثغرات مايملاها شي .
قالت جود بهدوء :-ياليت بس زواج بندر وندى ماخذين كل وقتي
نجوى بقهر لان عذر جود مقنع :-خساره ..بس لازم توعديني ان تجهيزات اول ولد لي تكون منك
رفعت جود حاجب ..وهي بارده داخليا وخارجيا
من الداخل حست ببرودة سكين الالم الي انغرست في قلبها وخارجيا بروود اللاتصديق
عيال ماجد ونجوى ..
كيف بتتحمل ..كيف بتعيش ..؟
قالت جود بحياديه :-اذا عطانا الله عمر
نجوى :-طبعا
قالت ام طارق بصوت في تشفي :- جود شفيك وجهك اصفر
ناظرتها جود وقالت بهدوء :-مابي الا العافيه متاكده انك تتوهمين ..
قالت ام ماجد تغير السالفه الي لها سنين ما انتهت واسلوب الاستفزاز ماتغير :-قولي يمه طلع فستانك
جود بابتسامه صادقه :-ايه يا خاله فستان زواج ندى طلع وبندر جت صدمه لنا زواجه بس يالله معنا شهرين الله يعيننا ونخلص كل شي بالوقت المناسب
عايشه بهباله :-شلون فستانك .؟
جود :-ليموني
عايشه :-وع ليموني وانتي اخت العروس
جود :-واذا اخت العروس
عايشه :-اخت العروس تلبس زهر لون مميز
جود بدون نفس :-ههههههه الليموني مو مميز
عايشه :-حتى لو انا واسما ء في زواجنا بنلبس زهر
ناظرتها جود مو مصدقه :-كلكم بتلبسون زهر
عايشه بغباء :-ايه
مسكت جود نفسها لا تضحك :-واو روعه
انبسطت عايشه تحسب جود جاده ..
قالت نجوى للبتول تتمصلح :-اقول البتول وش جهزتي للزواج
استحت البتول وولع وجهها
جود في نفسها (تحسب الكل مثلها مغسول وجهه بمرق)
اسمااااااء :-على بالك مستحيه يا الله قولي لنا
مسكت البتول نفسها لا تعصب ..هي تحاول تنسى موضوع الزواج وتجهيزاته مشاكله وبنات ولد عمها قليلات الذوق ما يفهمن ابد ..
لازم الا ستفزاز لازم تتذكر هالزواج الي ما تبيه الزواج الي تبغضه ..
قالت البتول بعصبيه :-مالك دخل في الي اسويه
ام ماجد طاح وجهها من بنتها العصبيه ..
ابتسمت جود يستاهلن من يهزئهن علني ..
دخل ماجد الصغيرون للخيمه وطوالي جلس عند جود ..
ام صالح :-مدري وش هالسحر الي راميته على البزران الصغار
جود :-هههههههههه سجر مره وحده لا تسمعنا اماني تصدق
الا واماني داخله
قالت تمزح :-لا والله اكيد مسويه لولدي شي
جود :-هههههههههههه شفتي قلت لك ..
ام صالح :-ههههههههههههههههههههه
قاطعتهم نجوى الي تحب تقط وجهها بكل شي يخص ماجد واهله :- مجود حياتو تعال سلم على خاله
دفن ماجد الصغير وجهه في حضن جود وعيا يروح لها ..حاولت فيه وهو رافض
انقهرت منه مره قالت اماني تصرف :-قم سلم على خاله نجوى
ماجد بهمس :-مابي

اماني :- مجود عيب هذي خاله
ماجد :-مابي خاله جود
تغير لون نجوى ..سكتت اماني ما تكلمت عارفه انها لا قالت انه بزر بتاكلها نجوى وتقول انها هي السبب وانها متحيزه لجود ..
قالت ندى تغير الجو :-كلمتني آمال وهي جايه بالطريق
تحمسو البنات ..قالت ريووف :-خساره ماجت الا قبل رجعتنا بيوم
ندى :-بركه انها قررت تجي تعرفين موسوسه على عيالها
ام صالح :-عقبال ماشوفك يمه وعيالك حولك
استحت ندى وسكتت ..
،
،
بعد بساعه وصلت آمال وعيالها معها وزوجها عبد المجيد
كانت امال مكتمله الجمال لانها وصلت لسن النضج ..شعر اسود كثير لحد الكتوف ..وجسم مليان حلو وبياض فيها من خواتها كثير .
دخلت امال تشيل بنتها رهف الي عمرها 6 شهور ..
آمال :-السلام
وراحت تحب راس جدتها وامها وتسلم على الباقي ..
ام صالح :-ياهلا يمه زين انك جيتي
امال :-والله يا جده اخاف على رهف من البرد وقلت ليله ماراح تضر وجيت
جود (تستهبل) :-ههههههههه قولي ما قدرتي تتحملين وجيتي
امال (تستهبل) :-ايه ماقدرت اتصبر وجيت عندك مانع هههههههههه
ام بندر :-حشا بزران
امال :-هههههههه ماعليك منها يمه بزر اخبارك انتي
ام بندر :-بخير يمه مادامنك انتي واخوانك بخير
امال :-الله يخليك لنا يارب
ام بندر :-سلمتي على ابوك
امال :-ايه سلمت عليه قبل لا اجيكم
وتذكرت شي..
امال بفجيعه :-يوه يمه نسيت مجود يبي يسلم عليك برى
جود :- هههههههههههههههههههه الله يخلف عليه من رجال
امال :-بنت انطمي
البنات :-ههههههههههههههههههههههههههههههههه
ام بندر وهي توقف :-الله يهديك يمه احد ينسى رجله
امال ووجها احمر :-مانسيته يمه السبب كله من جود
جود وعيونها متر قدام :-انا السبب اصلا انا شماعه العيله مالت عليكم
ندى :-طالع ذي هههههههههههههه
امال بهمس لندى :-ترى فستانك طلع قبل يومين ومعدلينه صح يجنن
ندى بوناسه :-جد
امال :-ايه روعه ماعليه كلام
ندى براحه واضحه :-والله اني شايله همه
امال :-ماله داعي التوتر وهالامور خليك ريلاكس
تدخلت ام طارق بلقافتها المعتاده :-وش تساسرون فيه .؟
قلبت امال عيونها والتفتت يمها :-ولا شي الله يسلمك نتكلم عن تجهيزات العرس
ام طارق ببشاشه :-مادريتي .؟
امال :-خير ؟
ام طارق :-خير اكيد خير تحدد زواج ماجد ونجوى
غاب اللون عن وجه امال وبغت تطيح رهف من حضنها لولا ان ندى لفت السالفه وخذتها من امها بدون محد ينتبه
قالت امال بابتسامه ظاهريه :-لا زين مبروك
ام طارق :-يبارك فيك
تدخلت نجوى :-شفتي ياعمه اقول لجود تساعدني ومعيه
امال في نفسها (عقربه طالعه على الوالده الله يسلمها)
امال :-ياعمري يا جود بحلانه في عمرها عندنا زواج ندى وزواج بندر انتي بس رتبي امورك وان شاء الله كل شي بيمشي اوكي ..
خزتها جود بنص عين وسكتت وقفت وقالت لندى :-عطيني رهوف
واخذتها وقامت ندى معها قالت جود بتعصيبه :-مصدقه انها ميته على ذوقي في اللبس
ندى بقهر :-عارفه انها تستفزك ..؟
جود وهي شاخصه بالنظر قدام من القهر :-تخسي ان فتحت فمها مره ثانيه توطيت في بطنها انا ماقد دست لها على طرف وانا ماحبها خلقه حتى قبل لا تتزوج ماجد (وخنقتها الغصه)
انهارت جود بالبكاء اخذت ندى رهف منها وضمتها تهديها :-الله يخليك يا جود بلا صياح هذا الي تبيه
جود وهي ترجف وتمسح دموعها بقفا يدها :-يكفي انها ذبحتني يوم اخذته مقدر اتحمل يا ندى ماعاد فيني قدره اتحمل
ارمشت ندى كم مره عشان توخر دموعها :-جود خلاص اذكري الله هذا النصيب
جود بانهيار وهي متمسكه في اختها :-يا ندى مقدر اعيش بدونه مقدر احس اني بموت
ندى وهي تمسح شعرها :-مرت ثلاث سنين على ملكته خلاص يا جود انتهينا ..؟
غمضت جود عيونها وهي مو قادره توقف دموعها ..

وتلومني فيك يوم اغليك..
يا اول همومي وتاليها
ابيع كل البشر واشريك ..
باول سنيني وماضيها
ياغايب صرت افكر فيك..
يا اغلى جروحي ومشقيها
تطول بي حروتي واجيك ..
والرجل تسبق خطاويها
اطلب عيوني وانا بعطيك ..
تستاهل الروح واهديها
اشارة من نظر عينيك ..
اجيبها لك ووديها
قلبي يكلمك ويناديك ..
من غيرك الناس مابيها
روحي بها محدن يساويك ..
انت الذي ساكن فيها
العين في غيبتك تطريك ..
تبكي من فراق غاليها
يكفي عذاب الله يخليك ..
بعدك وصدك معنيها
قصيدة الحب بين يديك ..
ماظنك تكون ناسيها
بحروفها الدافيه تبكيك ..
وعيوني الدمع معميها

بعد دقايق لحقتهم امال وشاف وجه جود ودموعها ..
امال :-خير شصاير ..
جود بصوت متحشرج من البكا :-ولاشي بروح اغسل وجهي
وراحت
قالت امال لندى :-علامها ..؟؟
ندى وهي تحب راس رهف :-لاشي جديد
امال جاها احباط من اختها :-ياربي لمتى ..؟
ندى بواقعيه :-امال نلعب على انفسنا الي يحب حب صادق عمره ماينسى
امال وهي تاخذ رهف :-كان عندي امل يا ندى يكون حب مراهقه وخرابيط مادريت ان السالفه جد في جد اختنا بيضيع شبابها في حب وهم
طلعت عيون ندى قدام :- وهم ؟
امال :-ايه وهم اجل ايش ماجد ماراح يكون لجود لانه متزوج بنت اخوها انتي مستوعبه شقول بنت اخوها يعني محرم عليها خلاص ..غير ان ماجد مانسى حركة جود فيه وعلى طول تزوج نجوى رد عليها ياليتنا نقنعها بالشي ذا عشان تشوف حياتها وزي مامشى هو حياته لازم تمشي اهي حياته ..
ندى باكتئاب :- من اول يوم خيمنا فيه ونجوى تستفزها مدري وش تبي منها ..
امال وهي عاقده حواجبها :-اه هي حاقده لان ماجد كان يبي جود ولو تدري عن الي صار كان ولعت في جود حريقه
ندى بخوف :-بسم الله على اختي من هالشينه
امال :-الله يعين والله احباط
ندى :-لا تذكريني على كثر مانا فرحانه على كثر ماني شايله هم جود
امال :-الله يستر
ندى :-يالله نرجع الجو بيتعب رهوف
امال :-يالله
/
/
/
/
@@@@>في خيمة الرجال
ضرب صداع راس خالد وحس بالم مو طبيعي ..
بندر وهو يشوف وجهه اصفر :-خالد فيك شي
خالد بابتسامه :-سلامتك صداع
بندر :-لايكون اخذت برد
خالد :-محتمل بروح اخذ دواء من السياره
ووقف لسيارته مايشوف من الالم الي يضغط على راسه ..
دق جواله الثريا ابتسم رغم وجعه ..:-ياهلااااااا وغلااااااااا
طارق :-ياهلا فيك
خالد هو يجلس على طرف مرتبة السياره ورجوله بالارض :-اخبارك وينك الحين ..
طارق :-ههههههههههههههه وحده وحده
خالد :-ههههههههههه الله يرجك ياشيخ قل لا يكون بس متزوج اوروبيه وحنا ما ندري
طارق :-هههههههههه فالك ماقبلناه انا ان تزوجت اخذت بنت اصل وفصل من ديرتي
خالد :-كفو يالنسيب
طارق :-هههههههههههه نسيب من بعيد هو انت كل من يقرب لحرمك المصون صار نسيب لك
خالد :-احمممممممممم
طارق :-ههههههههههههههههههه فهمنا الاشاره ..
خالد :-ايه خلك محترم ازين لك
طارق(يستهبل) :-جرحت مشاعري
خالد :-ههههههههههههههه فارق مناك
عقد طارق حواجبه :-خالد صوتك علامه
خالد :-مصدع
طارق :-اخذت مسكنات
خالد :-الحين باخذ ما قلتلي وينك
طارق وابتسامه خبيثه على فمه :-عندي سفريه الليله مقدر اجي
جلس خالد يفكر :-غريبه توك جاي قبل امس من برى
طارق ببراءه :-واحد من الطيارين اخذ اجازه وبما انك طاقها اجازه طاحت في راس العزوبي المسكين طارق
خالد :-هههههههههههههههه تنرحم صراحه تزوج وفكنا
طارق :-احلف بس
خالد :-والله
طارق :-هههههههههه اقول خذ المسكن ابرك لك
خالد :-ان شاء الله عمي
طارق :-ههههههههههه يالله سلام
خالد :-سلام
سكر طارق الجوال وهو يبتسم باقي ربع ساعه ويوصل للمخيم بيذبحه خالد ..
اخذ خالد المسكن وتدريجيا خف الالم ...ثم رجع المخيم
قال بندر :-هاه بشر
خالد بابتسامه :-تمام ميه ميه ...
بندر :-الحمد لله
وقف بندر وقال لخالد :-انا بروح اتمشى تجي معي
خالد :-لا والله ماصدقت الصداع خف خلني جالس ابرك
بندر :-هههههههههه طيب
طلع بندر من المخيم يمشي كان لابس نظاره شمسيه ومالبس شماغ ولا شي ..الجو كان روعه مثل الايام الي فاتت ..
وقف بندر جامد هذولي خواته والبتول والا يحلم ..ابتسم بخبث ومشى يمهن ..
كانت البتول مندمجه بالسوالف وما انتبهت لابتسامات امال وندى ..
لكن بندر اشر لهن يسكتن ..
قرب منهم وقال :-السلام عليكم
جمدت البتول في مكانها من الخوف والرجفه استبدت فيها من راسها لاصابيع رجولها
ما التفتت ولا شي وعيونها متسمره بالارض ..
قال بندر بابتسامه :-القاء السلام سنه ورده واجب
شب وجهها ضو لانه يقصدها قالت للبنات :-انا برجع المخيم
ومن الرباشه التفتت بسرعه وصدمت فيه بقوه كان موقف محرررررررج بكل معنى الكلمه
مسكها لا تطيح قال يهمس بدون شعور :-بسم الله عليك
رفعت عيونها وطاحت بعيونه الي كلها خوف عليها لا تطيح استوعبت الوضع الي هي فيه وحطت رجلها للمخيم ..

آمال :-اخس والله ونعرف للرومنسيه
قلبه يرجف بقوه .. وروحه مع الي راحت تركض للمخيم
ناظر اخته وفي عيونه ضحكه :-لايكثر بس
لكن امال ما تفوت أي فرصه :-روح الحقها ماله داعي تجلس وانت ماتبي
بندر (في نفسه وده يلحقها بس الثقل صنعه) :-ههههههههههههه طالع ذي تبي تفتك مني بأي طريقه ليه مواعده الاخ مجود وتبين تصرفيني
طلعت عيون ندى قدام :-هيه تراي هنا وانتي مواعده رجلك وانا معك
بندر :-ههههههههههههههههههههههههههه
امال :-هههههههههههههههههههههههه اختي ذي فيها نسبه غباء
ندى :-مخليه لك الذكاء ههههههههه
ناظرته امل وهي تغمز :-وانت شعندك تجول في الانحاء
بندر :-الحين ماعندك شي بريء انتي
امال :-ههههههههههههههه نو وي
بندر :- ماقول الا مالت اعود للشباب ابرك
امال :-ههههههههههههه ايه قل كذا من اليوم
ضحك بندر وراح راجع للمخيم ..
وفي دربه لقى ماجد يمشي رايح ..
بندر :-على وين
ماجد وهو يرفع الناريه :-الصيد طبعا
بندر :-هههههههههههه طيب انتظرني بجيب سلاحي ونروح سوا
ماجد :-تم
ووقف ينتظره وراح بندر للمخيم ..
بعد خمس دقايق رجع ,,
ماجد :-ماشاء الله عليك سريع
بندر :-ههههههههههههههههه تطنز على راحتك
ماجد يستهبل :-يحق لي
بندر :-ههههههههههههه الله يعين الي بتاخذك
ناظره ماجد بنص عين :-قل يا حظها (شوي الا يتذكر) اقول انت ناسي اني معرس
بندر يفكر :-ههههههههههههههههههههه ايه صح نسيت
ماجد :- مالت عليك ما تلاحظ انك دايم تنسى
بندر :-شسوي لك وانت نساي مثلي وبعدين (يتكلم كنه شايب) يا وليدي الخطا خطاك لانك ما سويت عرسك للحين
جا بيرد ماجد الا ويقز بعيونه شي ..
بندر وهو يشوف ملامحه تنقلب جديه وكلها تركيز :- شفيه..؟؟
ماجد وهو ياشر بيده :-طالع هناك مو ذاك جمس
بندر وهو يناظر المكان الي ياشر له ماجد :-ياخي مدري كيف تشوف زين من هالمسافه ..
ومع شوية تركيز شاف الي كلمه عنه ماجد :-ايه ايه شفته
ماجد :-شكلهم في مشكله تعال نشوف من بعيد لبعيد ..
بندر :-مشينا
قربو من الجمس لقوه كله بنات وكانو مغرزين ..
شافتهم وحده من البنات وطاح قلبها ..قالت تكلم الباقيات :-فيه رجالين جايين ومعهم سلاح
قالت الثانيه :-يمه رحنا فيها ..
الثالثه :-لاتفاوولين
الرابعه :-لااااا يا فضيحتنا كله بسببك يا نوف
الاولى (نوف) :-انا ما سويت شي الحين بدال الهواش دورن لنا حل في مصيبتنا ذي
والي جلست تصيح والي تنافض خوف ..الا نوف بقت متماسكه تدور حل ..راحت تفتش السياره مالقت فيها شي الا العجرا صحيح انها بديل غبي بس شي ارحم من انها توقف بدون مقاومه بدون شي ..
حطت العصا على طرف قريب منها وجلست تنتظر..
،
قال ماجد :-شكلهن مغرزات متاكد ما معهن احد
بندر :-ايه انت تشوف رجال
ماجد :-لا
وناظر في ساعته ..وكمل :-الشمس بتغيب تعال نطلعهن خلهن يتسهلن
الا وتركي طاب عليهم :-سلام وش تسوون
ماجد :-جابك الله تعال نبيك تعاونا
تركي :-ابشر بالمعونه وش صاير
ماجد وهو ياشر على الجمس :-تعال وبعدين تفهم
ومشوا لين قربو من الجمس ..قال ماجد :-بس وقفوا هنا مانبي نخوفهن ..
،
قالت وحده من البنات وهي تبكي وتتراجف :-نوف وش السواة صارو ثلاثه والدنيا بتليل الحين والله اعلم كم واحد كلمو يجي
بدت نوف تراجف وتفقد شجاعتها :-خلاص اص اعصابي موب ناقصه صياح
طلعت عيونها قدام :-نوف فيه واحد ينادينا ..
تغطت نوف وقالت :-نعم
ماجد :-خير ان شاء الله فيكم شي يا اختي
نوف بتوتر :-لا مافينا شي خذ اخوياك وتسهل اهلنا بيجون الحين
ماجد عرف انها في مشكله وخايفه منهم زين انها ماجتها حاله هستيريه زي باقي خوياتها ..
ماجد بهدوء وثقل :-اسمعي يا بنت الاجواد ما يهون علينا نشوف بنات في مشكله ونعطيهن ظهورنا ونروح والمكان زي ماتشوفين مليان ناس ومو كلهم يضمرون خير خلينا نساعدكم ونوصلكم لاهلكم سالمات ..
لكنها مازالت معنده :-لا انتم تسهلو وحنا ندبر امورنا ..
ماجد :-ما تبينا نساعدكم اجل ما حنا متحركين من هنا الا لين نتاكد انكن بخير
جت بترد عليه الا سياره مليانه شباب جايه يمهم ..
قرب ماجد من سياره البنات وتراجعت نوف ورى ..
قال واحد من الي بالسياره :-خير يالاخو
(حمد ماجد ربه لانه يحسبون السياره له)
ماجد بهدوء وهو يناظر بسرعه في كفر السياره :-الخير بوجهك شي بسيط ان شاء الله